ԵՐԵՎԱՆ, 7 օգոստոսի - Sputnik. Սփյուռքահայ մի շարք համայնքներում դեսպանների նոր նշանակումները դժգոհության ալիք են բարձրացրել։ «Փաստ» թերթը, վկայակոչելով ԱԳՆ-ի իրենց աղբյուրները, գրում է, որ մասնավորաբար Լիլիթ Մակունցի նշանակումը ԱՄՆ-ում ՀՀ արտակարգ և լիազոր դեսպանի պաշտոնում բավականին վատ է ընդունվել տեղի հայ համայնքի մեծ մասի, այդ թվում՝ ԱՄՆ-ում գործունեություն ծավալող հայկական ակտիվ հասարակական-քաղաքական շրջանակների կողմից։
Թերթի տեղեկություններով՝ թե՛ ԱՄՆ-ում, թե՛ Ուկրաինայում, թե՛ մի քանի այլ երկրներում հիմնական դժգոհությունը պայմանավորված է այն հանգամանքով, որ նոր նշանակումները բացառապես քաղաքական են, ընդհանրապես չեն բխում հայ համայնքների շահերից։ Ավելին՝ ԱՄՆ հայ համայնքի ներկայացուցիչներից մի քանիսը թերթին ասել են, որ Մակունցն այն կերպարը չէ, որ կարողանա լուծել ԱՄՆ-ի հայ համայնքի խնդիրները։
«Արդեն իրականություն դարձած ու սպասվող քաղաքական դեմքերի նշանակումները, բացի հասարակությունից, մեր տեղեկություններով, լուրջ դժգոհություն են առաջացրել նաև հայ դիվանագետների շրջանում, քանի որ դիվանագիտության և միջազգային հարաբերությունների հետ ոչ մի կապ չունեցող անձանց օրվա իշխանությունները շռայլորեն շնորհում են դեսպանի բարձր կոչում, ինչն ուղղակի վիրավորական է ոլորտում բազմամյա վաստակ ունեցող անձանց համար»,- գրում է թերթը։
Հիշեցնենք, որ դիվանագիտական համակարգում փոփոխությունները շարունակվում են, այդ թվում՝ տարբեր երկրներում նոր դեսպաններ են նշանակվում։ Վերջին աղմկահարույց նշանակումը «Իմ քայլը» խմբակցության նախկին ղեկավար Լիլիթ Մակունցի նշանակումն էր ԱՄՆ-ում ՀՀ արտակարգ և լիազոր դեսպանի պաշտոնում։
Հավելենք, որ այս տարվա հունիսին Ուկրաինայում ՀՀ դեսպան նշանակվեց վարչապետ Նիկոլ Փաշինյանի նախկին խոսնակ Վլադիմիր Կարապետյանը։ Նրա՝ այդ պաշտոնում նշանակվելու լուրը վաղուց էր շրջանառում մամուլում:
Ըստ լուրերի` նրա կինը՝ Լիլիթ Նազարյանը, դեռ նախորդ տարվա հոկտեմբերից ապահովում է Փաշինյան-Ալիև գաղտնի կապը և Կիևում մի քանի հանդիպում է ունեցել Ալիևի ներկայացուցչի հետ: Ըստ նույն աղբյուրների` ադրբեջանական կողմը պահանջել էր, որ Փաշինյանի կապավորը լինի պաշտոնատար անձ, ինչով էլ մեկնաբանվում էր Կարապետյանի նշանակման հավանականությունը: