ԵՐԵՎԱՆ, 7 օգոստոսի - Sputnik. Ոստիկանությունը պարզել է, թե ով է ծեծի ենթարկել Երևանի Աջափնյակ վարչական շրջանի ղեկավարի տեղակալ, 30-ամյա Արտակ Հակոբյանին։ Shamshyan.com-ի տեղեկություններով՝ կասկածվում է Երևանի բնակիչ, 20-ամյա Գեորգի Գալստյան։ Կայքը գրում է, որ ոստիկանությունը ձեռնարկում է անհրաժեշտ օպերատիվ-հետախուզական միջոցառումներ՝ կասկածյալին հայտնաբերելու ուղղությամբ:
Ավելի վաղ հայտնել էինք, որ Աջափնյակ վարչական շրջանի ղեկավարի տեղակալ Արտակ Հակոբյանը հաղորդում է ներկայացրել ոստիկանություն իրեն հասցված մարմնական վնասվածքների առնչությամբ։ Sputnik Արմենիայի հետ զրույցում ոստիկանությունից հայտնել էին, որ օգոստոսի 2-ին՝ 10:50-ի սահմանում, Հակոբյանը դիմել է իրենց՝ նշելով, որ նույն օրը առավոտյան իրեն հարվածներ, մարմնական վնասվածքներ են հասցվել։
«Եղել է ոչ թե հարձակում, այլ ծեծկռտուք և վիճաբանություն»,- նշել էին ոստիկանությունում։
Նշանակվել էր դատաբժշկական փորձաքննություն։