ԵՐԵՎԱՆ, 7 օգոստոսի - Sputnik. Կոտայքի մարզի Ձորաղբյուր գյուղում տղամարդուն սպանելու կասկածանքով ձերբակալվել է նրա 16-ամյա որդին։ Տեղեկությունը հայտնում է ՀՀ քննչական կոմիտեի մամուլի ծառայությունը։
Հիշեցնենք՝ օգոստոսի 6-ին՝ ժամը 12:05-ին, «Աբովյան» բժշկական կենտրոնից հաղորդում էր ստացվել այն մասին, որ Կոտայքի մարզի Ձորաղբյուր գյուղի տներից մեկում մարդ է մահացել:
Անմիջապես դեպքի վայր մեկնած իրավապահները նշված տան հյուրասենյակի բազմոցին հայտնաբերել են տղամարդու դի՝ կրծքավանդակի, պարանոցի շրջաններում բազմակի ծակած-կտրած վերքերով:
ՔԿ-ն տեղեկացնում է, որ նույն օրը՝ ժամը 13:00-ին, հաղորդում է ստացվել նաև մահացած տղամարդու կնոջից այն մասին, որ առավոտյան իր որդին դանակով հարվածներ է հասցրել հորը:
Դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի (Սպանություն) 1-ին մասի հատկանիշներով:
Իրականացված անհետաձգելի քննչական և այլ դատավարական գործողությունների արդյունքում պարզվել է, որ տղամարդուն վնասվածքները պատճառել է նրա անչափահաս՝ 16-ամյա որդին: Պատանին ձերբակալվել է՝ հորը սպանելու կասկածանքով։
«Նախաքննության ընթացքում կատարվել են անհրաժեշտ քննչական գործողություններ, այդ թվում՝ դեպքի վայրի զննություն, որի ժամանակ հայտնաբերվել են արնանման հետքեր, վերցվել են փորձանմուշներ, հարցաքննվել են մի շարք անձինք։ Նշանակվել են դիակի դատաբժշկական, դատագենետիկական, դատահետքաբանական և դատակենսաբանական փորձաքննություններ, առգրավվել են տուժողի և առերևույթ հանցագործություն կատարած անձի հագին դեպքի պահին եղած հագուստները»,- նշված է հաղորդագրության մեջ։
Ձեռնարկվում են համապատասխան միջոցառումներ՝ դեպքի բոլոր հանգամանքները պարզելու, նաև հանցագործության գործիք հանդիսացող դանակը հայտնաբերելու ուղղությամբ: