ԵՐԵՎԱՆ, 7 օգոստոսի - Sputnik. ԱՄՆ-ի ռազմաօդային ուժերի B-52 Stratofortress ռմբակոծիչներն ավիահարվածներ են հասցրել «Թալիբան» ծայրահեղական շարժման ուժերին։ Թալիբները ծանր կորուստներ են կրել Ջաուզջան նահանգի մայրաքաղաք Շիբերգանում:
«Թալիբների խումբը դարձել է B-52-ի թիրախը Ջաուզջան նահանգի Շիբերգան քաղաքում։ Ահաբեկիչները ծանր կորուստներ են կրել ԱՄՆ ՌՕՈւ ավիահարվածների հետևանքով»,- Twitter-ում հայտնել է Աֆղանստանի պաշտպանության նախարարության ներկայացուցիչ Ֆավադ Ամանը։
Նշենք, որ ավելի վաղ Times պարբերականը, վկայակոչելով ԱՄՆ-ի պաշտպանական գերատեսչությունում իրենց աղբյուրները, հայտնել էր, որ Վաշինգտոնն Աֆղանստան է ուղարկել B-52 ռմբակոծիչները՝ «Թալիբան» արմատական շարժման զինյալների դեմ պայքարելու համար:
Հավելենք, որ Աֆղանստանում վերջին ամիսներին թալիբները զգալի տարածքներ են գրավել գյուղական և սահմանային շրջաններում, հարձակումներ են ծավալել խոշոր քաղաքների ուղղությամբ: