ԵՐԵՎԱՆ, 6 օգոստոսի – Sputnik. «Քաղաքացիական պայմանագիրն» առաջնային ընտրելու է պաշտպանության, անվտանգության և պետաիրավական հանձնաժողովները։ Ազգային ժողովում լրագրողների հետ զրույցում այս մասին հայտնեց «Քաղաքացիական պայմանագիր» խմբակցության քարտուղար Նազելի Բաղդասարյանը։
«Խմբակցությունների միջև հստակ քաղաքական կոնսուլտացիաներ չեն եղել և ընդդիմության հետ որևէ համաձայնություն չունենք` մենք մշակում ենք մեր ռազմավարությունը, թե որ հանձնաժողովներն ենք ընտրելու»,–ասաց Բաղդասարյանը։
Հարցին, թե «Պատիվ ունեմ»-ի Արցախի հարցերով հանձնաժողովի ստեղծմանը կո՞ղմ են քվեարկելու, թե ոչ Բաղդասարյանը պատասխանեց, որ այս պահին 2 հանձնաժողովի առաջարկ կա` ՔՊ–ինը և «Պատիվ ունեմ»-ինը և տրամաբանորեն իրենց նախագծի օգտին են քվեարկելու։
Հիշեցնենք, որ ՔՊ-ն առաջարկում է միայն մեկ փոփոխություն անել՝ կիսել և երկու հանձնաժողով ձևավորել առողջապահության և սոցիալական հարցերի հանձնաժողովից։
ԱԺ փոխխոսնակ Իշխան Սաղաթելյանն էլ իր հերթին այսօր հայտնել էր, որ ընդդիմությանը հետաքրքրում են անվտանգության, արտաքին քաղաքականության ու տնտեսության բլոկերը։