ԵՐԵՎԱՆ, 6 օգոստոսի – Sputnik. ՄԱԿ–ն Ադրբեջանին և Հայաստանին հորդորում է զսպվածություն դրսևորել երկու երկրների սահմանին շարունակվող բախումների ֆոնին։ ՏԱՍՍ–ի փոխանցմամբ` այս մասին այսօր ճեպազրույցի ժամանակ հայտարարել է ՄԱԿ–ի գլխավոր քարտուղարի պաշտոնական ներկայացուցչի տեղակալ Ֆարհան Հաքը։
«Մենք շարունակում ենք կողմերին զսպվածության կոչ անել զերծ մնալ լարվածությունն ավելացնող գործողություններից և երկխոսության միջոցով լուծել առաջացող խնդիրները», – ասել է նա։
Հիշեցնենք` ադրբեջանցիները մայիսի 12–ից Գեղարքունիքի մարզի Սև լճի տարածքում են և հրաժարվում են հետ քաշվել իրենց դիրքեր։ Հայաստանի ղեկավարությունը նշում է, որ ամեն ինչ անում են այս հարցը դիվանագիտական ճանապարհով լուծելու համար։
Իսկ ադրբեջանցիներն իրենց հերթին ժամանակ առ ժամանակ սադրանքների են դիմում հայ–ադրբեջանական սահմանի տարբեր հատվածներում։
Հուլիսի 28-ին ադրբեջանական ԶՈւ ստորաբաժանումները հերթական անգամ դիմել էին սադրանքի և խախտել հրադադարը հայ-ադրբեջանական սահմանի հյուսիսարևելյան հատվածում: Հայաստանն ու Ադրբեջանը համաձայնել էին Մոսկվայի միջնորդությամբ դադարեցնել կրակը։
Սակայն դրան հաջորդող օրերին նույնպես ադրբեջանցիները պարբերաբար խախտում են պայմանավորվածությունը` կրակելով հայկական դիրքերի ուղղությամբ։
Ավելին` հուլիսի 29–ի լույս 30–ի գիշերը հայ-ադրբեջանական սահմանի Գեղարքունիքի հատվածում արձանագրվել են ԱԹՍ-ների՝ ՀՀ օդային տարած մուտք գործելու փորձեր։
Հուլիսի 30–ին խոցվել է Ադրբեջանի ԶՈւ սպառազինության մեջ գտնվող «Aerostar» տիպի ԱԹՍ, որի բեկորներն ընկել են Գեղարքունիքի մարզի Վանեվան գյուղից 3.5 կիլոմետր դեպի հյուսիս։
Հուլիսի 31-ին ադրբեջանցիները կրակ են բացել Երասխի ուղղությամբ, փորձել ամրաշինական աշխատանքներ կատարել, ավելի ուշ նրանք կրակել են սնունդ տեղափոխող մեքենայի վրա։
Հրադադարը երասխի ուղղությամբ խախտվել է նաև այսօր` օգոստոսի 6–ին. Ադրբեջանը կրակ է բացել Երասխի ուղղությամբ, հրդեհվել է միջդիրքային հատվածի խոտածածկույթը։