ԵՐԵՎԱՆ, 6 օգոստոսի - Sputnik. Ազգայն ժողովի փոխնախագահ Իշխան Սաղաթելյանն այսօր լրագրողների հետ զրույցում ասաց, որ ընդդիմությունը կուզեր ստանալ խորհրդարանական ամենակարևոր հանձնաժողովները։
«Հակառակորդը երկրի տարածքում է։ Այժմ առավել քան արդիական են անվտանգության հարցերը, ու մենք, բնականաբար, ուզում ենք գլխավորել պաշտպանության և անվտանգության հարցերի հանձնաժողովը, բայց իշխանությունն ամենայն հավանականությամբ կփորձի պահել այն», - ասաց փոխխոսնակը։
Նա ավելացրեց, որ դաշինքն ուզում է գլխավորել Արցախի հարցերի հանձնաժողովը, եթե այն այնուամենայնիվ ձևավորվի: Սաղաթելյանը հիշեցրեց, որ դրա ձևավորումը նախաձեռնել է ընդդիմադիր «Պատիվ ունեմ» դաշինքը, իսկ «Հայաստանը» սատարել էր իր գործընկերներին:
«Մեզ հետաքրքրում են անվտանգության, արտաքին քաղաքականության ու տնտեսության բլոկերը, տեսնենք՝ ինչ կընտրի իշխանությունը, իսկ հետո արդեն մենք ընտրություն կկատարենք», - ասաց Սաղաթելյանը:
Հիշեցնենք` «Քաղաքացիական պայմանագիր» խմբակցությունն առաջարկում է ստեղծել 12 հանձնաժողով` միաժամանակ կիսելով առողջապահության և սոցիալական հարցերի հանձնաժողովը։