«Բարգավաճ Հայաստանը»` որպես քաղաքական միավոր ոչ միայն չի պասիվացել, այլև շատ ակտիվ քննարկումների մեջ է և անմասն չի մնալու քաղաքական գործընթացներից։ Այս մասին Sputnik Արմենիայի հետ զրույցում հայտնեց ԱԺ նախկին պատգամավոր, ԲՀԿ անդամ Արման Աբովյանը։
«Մեր տարածքային բոլոր գրասենյակները բաց են, աշխատում են, շատ ակտիվ կուսակցական աշխատանք է գնում։ Թող հույսները կտրեն բոլոր նրանք, ովքեր այս կամ այն պարագայում հույսեր են փայփայում, որ ԲՀԿ-ն կարող է քաղաքական գործընթացներից դուրս մնալ կամ պասիվանալ»,- ասաց Աբովյանը։
Թե ինչ գործընթացների մասին է խոսքը, Աբովյանը խոստացավ ավելի ուշ փակագծերը բացել։ Միայն հայտնեց, որ Գագիկ Ծառուկյանի հետ քաղաքական գործընթացների և կուսակցության հետագա անելիքների մասին վերջին քննարկումը մեկ օր առաջ է եղել։
Հարցին, թե աշնանը սպասվող ՏԻՄ ընտրություններին մասնակցելու են` Աբովյանը միանշանակ չպատասխանեց։ Ասաց` քննարկումները շարունակվում են։
«ՏԻՄ ընտրություններին պետք է հասկանանք մեր կոնկրետ անելիքները, կոնկրետ մարզերում, կոնկրետ քաղաքներում։ Կարող եմ ասել, որ մենք ծառայում ենք ոչ թե ընտրազանգվածին, մենք ծառայում ենք ՀՀ ժողովրդին»,- նշեց նախկին պատգամավորը։
Աբովյանը հերքեց Գագիկ Ծառուկյանին պատկանող «Կենտրոն» հեռուստաընկերության վաճառքի մասին խոսակցությունները, հորդորեց զերծ մնալ անհասկանալի և շինծու ասեկոսեներից։
Հիշեցնենք, որ հունիսի 20-ին տեղի ունեցած արտահերթ խորհրդարանական ընտրությունների արդյունքում ԲՀԿ-ն չհաղթահարեց ԱԺ անցողիկ շեմը. խորհրդարան են անցել «Քաղաքացիական պայմանագիր» կուսակցությունը, «Հայաստան» ու «Պատիվ ունեմ» դաշինքները։