ԵՐԵՎԱՆ, 3 օգոստոսի – Sputnik. 2020 թվականի նոյեմբերից սկսած ռուսական կողմի մասնակցությամբ վերադարձվել են 97 գերիներ, որոնցից 81- ը՝ հայկական կողմին, 16-ը՝ ադրբեջանական: Այս մասին Հանրային հեռուստատեսությանը տված հարցազրույցում ասել է Հայաստանում Ռուսաստանի դեսպան Սերգեյ Կոպիրկինը։
«Ելնելով այդ թվերից՝ մենք չենք կարող ասել, որ այդ հարցն անտեսվում է, և ոչ մի տեղաշարժ չկա։ Կցանկանայինք, որ այդ հարցը շատ ավելի արագ լուծվի։ Ի սկզբանե մեր սկզբունքային դիրքորոշումը եղել և մնում է այն, որ դա պետք է լինի բոլոր գերիների փոխանակումը», - ասել է Կոպիրկինը:
Նա ափսոսանք է հայտնել, որ այդ խնդիրը չի ստացվում լուծել արագ և հեշտ։ Նրա խոսքով ՝ իրականացվել և շարունակվում է տարվել անվանական աշխատանք։ Կոպիրկինը հավաստիացրել է, որ գերիների հարցը և գործընթացին աջակցելը ռուսական կողմի համար ամենակարևոր հարցերից է:
Դեսպանը նաև ընդգծել է դրանում խաղաղապահ զորակազմի հրամանատար գեներալ-լեյտենանտ Ռուստամ Մուրադովի առանձնահատուկ դերը:
Հիշեցնենք, որ հուլիսի 3-ին հայրենիք վերադարձան ևս 15 գերի. հայ գերիների վերադարձի դիմաց հայկական կողմն Ադրբեջանին է փոխանցել Վարանդայի (Ֆիզուլի) և Կովսականի (Զանգելանի) ականապատ դաշտերի քարտեզները։
Այսպիսով, Հայաստան վերադարձած գերիների ընդհանուր թիվը 103-ն է։ Ի դեպ, երբ Հայաստան վերադարձած գերիների թիվը 88-ն էր, վարչապետի պաշտոնակատար Նիկոլ Փաշինյանը հայտարարել էր, որ Ադրբեջանում պահվող հայ գերիների ճշտված թիվը 60 է, չճշտվածը՝ 110։
Ոչ պաշտոնական տվյալներով՝ Ադրբեջանում շարունակում են մնալ մոտ 200 հայ գերիներ։