Պատգամավորի լիազորությունները սկսվում են ԱԺ անդրանիկ նստաշրջանի առաջին նիստի օրը, իսկ եթե դրանից առաջ ինչ–որ իրավական գործընթացներ են տեղի ունեցել` կապված քրեական հետապնդման հետ, ապա տվյալ դեպքում Սահմանադրության պահանջն է, որպեսզի ՀՀ գլխավոր դատախազը միջնորդությամբ մտնի ԱԺ և հայցի խորհրդարանի համաձայնությունը նրանց նկատմամբ քրեական հետապնդումը շարունակելու առումով, քանզի Արթուր Սարգսյանն ու Մխիթար Զաքարյանն արդեն համարվում են անձեռնմխելի պետական պաշտոնյաներ։ Sputnik Արմենիայի հետ զրույցի ընթացքում նման կարծիք հայտնեց Վարդան Այվազյանը։
«Ինչ վերաբերում է նրանց` նիստին մասնակցելուն, ապա, այո, եթե նրանք դարձել են պատգամավոր, ուրեմն պետք է մասնակցեն ԱԺ նիստին, բայց եթե իշխանությունները շահագրգռված են, որ նրանք մնան ազատազրկման վայրում, ապա հենց այսօր էլ գլխավոր դատախազը համապատասխան միջնորդությամբ կարող է մտնել ԱԺ, որպեսզի Սարգսյանն ու Զաքարյանը զրկվեն անձեռնմխելիությունից, և «Քաղաքացիական պայմանագիրն» էլ դա կարող է անել իր մեծամասնությամբ»,– նշեց իրավագետը։
Այվազյանի կարծիքով` Սարգսյանին ու Զաքարյանին ԱԺ նախագահի թեկնածու առաջադրելը, ըստ էության ոչինչ չի կարող փոխել, որովհետև խորհրդարանի նախագահն ընտրվում է քաղաքական մեծամասնություն ունեցող ուժի ներկայացուցիչը։ Եթե անգամ գլխավոր դատախազն այսօր էլ չմտնի համապատասխան միջնորդությամբ, բնականաբար, առաջադրված անձինք չեն ընտրվի, ուստի ռիսկեր չկան, որ նրանք կարող են ընտրվել ԱԺ նախագահ և նրանց կարգավիճակն ավելի բարձրանա։
Իրավագետի համոզմամբ` ընդդիմադիրների քայլն ընդամենը քաղական պայքար է` հակամարտությունն ավելի ցայտուն ու տեսանելի դարձնելու համար, բայց անկախ ամեն ինչից` իշխանությունները պարտավոր են Արթուր Սարգսյանի և Մխիթար Զաքարյանի ներկայությունն ապահովել խորհրդարանում։
Ըստ նրա` ԱԺ հետագա գործունեության արդյունավետությունը և ներդաշնակությունը պայմանավորված կլինեն մեկ հանգամանքով, եթե ԱԺ–ն իր գործունեությունը ծավալի Սահմանադրության և Ազգային ժողովի կանոնակարգ սահմանադրական օրենքի տառին և ոգուն համապատասխան։
Նշենք, որ այսօր` օգոստոսի 2–ին ընթացող ՀՀ ԱԺ 8–րդ գումարման անդրանիկ նիստում «Հայաստան» դաշինքի պատգամավոր Սեյրան Օհանյանը հայտարարեց, որ ԱԺ նախագահի պաշտոնում իրենք առաջադրում են Մխիթար Զաքարյանի (Մեղրիի նախկին համայնքապետ) թեկնածությունը։
«Պատիվ ունեմն» էլ առաջադրեց Արթուր Սարգսյանի (Սիսիանի նախկին համայնքապետ) թեկնածությունը։ Վերջին երկուսն այս պահին կալանավորված են։
Հիշեցնենք, որ Արթուր Սարգսյանը կալանավորվել է հուլիսի 18-ին: Նրան մեղադրանք է առաջադրվել՝ Քրեական օրենսգրքի 308 րդ հոդվածի 2-րդ մասով (պաշտոնեական լիազորությունները չարաշահելը) և 314-րդ հոդվածի 1-ին մասով (պաշտոնեական կեղծիքը):
Մխիթար Զաքարյանը կալանավորվել է հուլիսի 13-ին: Նրան մեղադրանք է առաջադրվել Քրեական օրենսգրքի 308 րդ հոդվածի 2-րդ մասով (պաշտոնեական լիազորությունները չարաշահելը) և 314-րդ հոդվածի 1-ին մասով (պաշտոնեական կեղծիքը):