ԵՐԵՎԱՆ, 1 օգոստոսի – Sputnik. Անկարայում Հունաստանի գործերի ժամանակավոր հավատարմատարին կանչել են Թուրքիայի ԱԳՆ, որտեղ նրան բողոքի նոտա են հանձնել թուրք-հունական սահմանին Թուրքիայի քաղաքացու սպանության կապակցությամբ: Տեղեկությունը ՌԻԱ Նովոստիին է հայտնել Թուրքիայի արտգործնախարարության աղբյուրը։
«Երեկ Էդիրնե նահանգում Հունաստանի տարածքից քաղաքացիական հագուստով անձանց արձակած կրակոցից սպանվել է մեր քաղաքացին։ Այդ կապակցությամբ այսօր մեր ԱԳՆ է կանչվել Թուրքիայում Հունաստանի գործերի ժամանակավոր հավատարմատարը, որին բողոքի նոտա է հանձնվել»,-հայտնել է գործակալության զրուցակիցը։
Նա հավելել է, որ Թուրքիան պահանջել է ձերբակալել և պատասխանատվության ենթարկել այդ հանցագործության մեղավորներին, ինչպես նաև փոխհատուցում վճարել սպանվածի հարազատներին: