ԵՐԵՎԱՆ, 31 հուլիսի - Sputnik. Թուրքիայի նախագահ Ռեջեփ Թայիփ Էրդողանը երկրի հարավում անտառային հրդեհներից տուժած շրջաններն աղետի գոտի է հայտարարել:
«Մենք անտառային հրդեհներից տուժած մեր շրջանները աղետի գոտի ենք հայտարարել։ Մենք կշարունակենք ձեռնարկել բոլոր անհրաժեշտ քայլերը՝ մեր ազգի վերքերը բուժելու, վնասները փոխհատուցելու ու հնարավոր ամեն ինչ անելու համար, որ ավելի լավ լինի, քան նախկինում», - Twitter-ում նշել է Էրդողանը։
Ավելի վաղ Թուրքիայի գյուղատնտեսության և անտառային տնտեսության նախարար Բեքիր Փաքդեմիրլին ասել էր, որ վերջին երեք օրվա ընթացքում 70 անտառային հրդեհ հսկողության տակ է վերցվել: 11 հրդեհ շարունակվում է երկրի հարավում գտնվող Ադանա, Անթալիա, Մուղլա, Մերսին, Օսմանիե նահանգներում։
Հրդեհը վնասել է թուրքական Հայտնի Բոդրում և Մարմարիս հանգստավայրերին, որտեղ մի քանի հյուրանոցներից տարհանում է իրականացվել: Հրդեհը մարելուց հետո բոլոր տարհանված զբոսաշրջիկները վերադարձել են իրենց հյուրանոցներ։