ԵՐԵՎԱՆ, 29 հուլիսի – Sputnik. «Հարավկովկասյան երկաթուղի» ՓԲԸ-ն («Ռուսական երկաթուղիներ» ԲԲԸ-ի դուստր ընկերություը) վրացի գործընկերների հետ քննարկում է Երևանից Թբիլիսի էլեկտրագնացքի գործարկման գաղափարը։ Այս մասին Sputnik Արմենիային տված հարցազրույցում ասել է ընկերության գլխավոր տնօրեն Ալեքսեյ Մելնիկովը:
«Նման գնացքով Հայաստանի ու Վրաստանի բնակիչները միմյանց հյուր կգնան հանգստյան օրերին։ Ես կարծում եմ, որ այստեղ մենք ունենք բոլոր հնարավորությունները ավտոտրանսպորտային միջոցի հետ մրցակցելու համար և՛ գնով, և՛ արագությամբ, և՛ հարմարավետությամբ», - ասել է Մելնիկովը։
Նախնական հաշվարկներով՝ ճանապարհը կարող է տևել 6-7 ժամ։ ՀԿԵ գլխավոր տնօրենը նաև հայտնել է, որ մի քանի օրից երկու նոր էլեկտրագնացքներ կհանձնվեն ընկերությանը: Այժմ նրանք բեռվում են «Կովկաս» նավահանգստում։
Մելնիկովը նաև տեղեկացրել է, որ ուղևորների առավելագույն հարմարավետության համար ընկերությունը պատրաստ է Գյումրու օդանավակայանի հետ քննարկել չվացուցակները համաձայնեցնելու հարցը:
«Հարցը քննարկում ենք նաև Գյումրու քաղաքապետարանի և մարզպետարանի հետ։ Քաղաքային կայարանը մենք ցանկանում ենք վերածել տրանսպորտային հանգույցի՝ ամբողջ ենթակառուցվածքով», - հավելել է նա։
«Հարավկովկասյան երկաթուղի» ՓԲԸ-ն «Ռուսական երկաթուղիներ» ԲԲԸ-ի դուստր ընկերությունն է և իրականացնում է հայկական երկաթուղիների կոնցեսիոն կառավարումը:
«Հարավկովկասյան երկաթուղին» շուտով ևս երկու նոր էլեկտրագնացք կստանա