ԵՐԵՎԱՆ, 29 հուլիսի – Sputnik. Զինվորների մասունքները, որոնք Հայաստանում նույնականացնել չէր ստացվում, ուղարկվում են Հոլանդիա։ Կառավարության նիստի ավարտից հետո լրագրողների հետ զրույցում այսմասին ասաց ՀՀ առողջապահության նախարարի պաշտոնակատար Անահիտ Ավանեսյանը։
«Ունեինք մասունքներ, որոնց նույնականացման գործընթացը չէր հաջողվում իրականացնել։ Հոլանդացի մեր գործընկերների հետ կնքեցինք համաձայնագիր, և հիմա 50 փորձանմուշ տեղափոխման գործընթացի մեջ է»,–ասաց Ավանեսյանը։
Նրա խոսքով` փորձաքննության պատասխանը շատ արագ չի ստացվելու, քանի որ բարդ գործընթացներ պետք է արվեն։ Ավանեսյանը խոստացավ դրանց պատասխանները Հայաստան գալու պես` հանրայնացնել այն։
Հիշեցնենք, որ մայիսի 5–ի դրությամբ՝ Արցախյան վերջին պատերազմում զոհված զինծառայողների դիակներից և մասունքներից վերցված շուրջ 300 փորձանմուշ չէր հաջողվել նույնականացնել։
Զոհերի նույնականացման` արտերկրում և ՀՀ-ում արված ԴՆԹ-ի արդյունքները նույնն են. նախարար
Իսկ հունիսի 3-ի կառավարության նիստի ժամանակ վարչապետի պաշտոնակատար Նիկոլ Փաշինյանը հայտարարել էր, որ ունենք շուրջ 50 մասունք, որոնցից նույնիսկ 6-րդ փորձից հետո ԴՆԹ չի անջատվել։