ԵՐԵՎԱՆ, 27 հուլիսի - Sputnik. Մարտունու բժշկական կենտրոնը վերազինվեց նորագույն ռենտգեն սարքով։ Տեղեկությունը Facebook-ի իր էջում հայտնել է Գեղարքունիքի մարզպետ Գնել Սանոսյանը։ Մոտ 250 հազար եվրո արժողությամբ սարքը ձեռք է բերվել Առողջապահության համաշխարհային կազմակերպության նվիրատվությամբ։
Այսուհետև մարտունեցիները ստիպված չեն լինի ռենտգեն ախտորոշման համար մայրաքաղաք հասնել։ Մարզպետը լիահույս է, որ բժշկական կենտրոնում իրականացվող տեխնիկական ու կադրային վերազինումների, նոր հիվանդանոցի կառուցման և բարեփոխումների շնորհիվ Մարտունու տարածաշրջանի և մարզի բնակչության բուժսպասարկումը որակապես ոչնչով չզիջի այլ առաջատար բուժհաստատությունների մատուցած ծառայություններին։
Կորոնավիրուսի պատճառով վերաբացվել է Միքայելյան հիվանդանոցի Covid բաժանմունքը
Մարտունու տարածաշրջանը Հայաստանում ամենախիտ բնակեցվածներից է, իսկ Մարտունու դիրքն այնպիսին է, որ այս կենտրոնի մատուցած բուժծառայություններից կարող են օգտվել նաև հարևան մարզերի բնակիչներ: Մարզպետի հավաստմամբ՝ որպես մարզային հիվանդանոց՝ այստեղ մասնագետ բժիշկների պակաս չկա, միակ խնդիրը կապված է նման սարքավորումների բացակայության հետ, որն էլ աստիճանաբար լուծվում է։ Մեկ տարի հետո ավարտված կլինի նաև հիվանդանոցի նոր շենքի կառուցումը, ու բուժկենտրոնն ամբողջությամբ կտեղափոխվի նորակառույց շինություն։
Նշենք, որ ռենտգեն կաբինետի բացման արարողությանը և սարքավորման գործարկմանը ներկա են եղել ՀՀ առողջապահության նախարարի պաշտոնակատար Անահիտ Ավանեսյանը, Եվրամիության դեսպան Անդրեա Վիկտորինը, ՄԱԿ-ի մշտական համակարգող Շոմբի Շարփը, ԱՀԿ հայաստանյան գրասենյակի ժամանակավոր ներկայացուցիչ Ջենիֆեր Քոլինսը և այլք։
Մասնագետները որոնում են Հայաստանի համար առողջության ապահովագրության ճիշտ ճանապարհը