ԵՐԵՎԱՆ, 26 հուլիսի - Sputnik. Ճապոնիայի մայրաքաղաք Տոկիոյում շարունակվող 32-րդ ամառային օլիմպիական խաղերի բռնցքամարտի մրցաշարին մասնակցող Կորյուն Սողոմոնյանը (52 կգ), յուրաքանչյուր ռաունդում մեկական անգամ հայտնվելով նոկդաունում, ժամանակից շուտ պարտվեց Ջալալ Յաֆային ու ավարտեց իր ելույթները Տոկիո 2020-ում։
Չի կարելի ասել, որ բրիտանացին առավելություն ուներ մեր բռնցքամարտիկի նկատմամբ, բայց առաջին երկու ռաունդներում հայտնվելով նոկդաունում` արդեն տեսողական որոշակի պատկեր էր ստեղծվել, որ Յաֆայը ամեն դեպքում որոշակի առավելություն ունի։ Եվ կողային բոլոր մրցավարներն էլ առաջին երկու ռաունդներում հաղթանակը տվեցին հայ բռնցքամարտիկի մրցակցին։ Սողոմոնյանը չէր կարողանում գրոհել հարվածաշարերի միջոցով։ Մեկական հարվածներով էլ նպատակին հասնելը ամբողջ մենամարտի հանրագումարում, իհարկե, դժվար էր։
Երրորդ ռաունդում մեր բռնցքամարտիկը փորձեց շտկել իրավիճակը և բեկել մենամարտի ընթացքը։ Բայց երրորդ անգամ հայտնվելով նոկդաունում` վաղաժամ պարտություն կրեց։
Հուլիսի 26-ը հաջողակ չէր հայաստանցի օլիմպիականների համար։ Պարտվեց և պայքարից դուրս մնաց ձյուդոիստ Ֆերդինանդ Կարապետյանը, նույն արդյունքը գրանցվեց նաև բռնցքամարտիկ Կորյուն Սողոմոնյանի համար։ Բռնցքամարտի մրցումներում Հայաստանը ունի դեռևս երկու մասնակից։ Հուլիսի 29-ին իր առաջին մենամարտը ռինգում կանցկացնի 75 կգ քաշային Արման Դարչինյանը, որի մրցակիցն է լինելու սլովակ Անդրեյ Չեմեզը, իսկ 63 կգ քաշային կարգում Հովհաննես Բաչկովը հուլիսի 31-ին մրցելու է ադրբեջանցի Ջավիդ Չալաբիևի հետ։
Հիշեցնենք` Տոկիոյի 32–րդ օլիմպիական խաղերը մեկնարկել են հուլիսի 23–ին և կավարտվեն օգոստոսի 7–ին։
«Վաղը նավթ չենք վաճառելու, այլ...». ՀՀ նախագահը պատմել է` ում հետ ինչ է խոսել Տոկիոյում
Օլիմպիական խաղերն անցկացվում են մեկ տարի ուշացումով կորոնավիրուսի համավարակի պատճառով:
Օլիմպիադային մասնակցում է 206 երկրի 12500 մարզիկ։ Նրանք մրցում են 33 մարզաձևում՝ պայքարելով 339 մեդալի համար։
Սպորտային այս տոնին Հայաստանը ներկայացնում են 17 մարզիկներ 8 մարզաձևում:
Օլիմպիական հավաքական. ովքեր կներկայացնեն Հայաստանը Տոկիոյում