ԵՐԵՎԱՆ, 26 հուլիսի – Sputnik. Ադրբեջանի վերահսկողության տակ անցած Քարվաճառի սահմանին այս գիշեր լարված է եղել։ Sputnik Արմենիայի տեղեկություններով` ադրբեջանական կողմը կրակոցներ է արձակել։ Նշենք, որ կրակոցներ են հնչել Սոթքի հանքի մոտակայքում, որտեղով անցնում է սահմանը։
Ադրբեջանի ՊՆ-ն այսօր հայտարարել էր, թե ՀՀ ԶՈւ ստորաբաժանումները առավոտյան ժամը 3-ից կրակ են բացել Քարվաճառում տեղակայված ադրբեջանական դիրքերի ուղղությամբ։ ՀՀ պաշտպանության նախարարությունը հերքել է ադրբեջանական բանակի դիրքերը գնդակոծելու տեղեկությունը։
«Գեոպրոմայնինգ Գոլդ» ընկերությունից Sputnik Արմենիային տեղեկացրին, որ հնչել են անկանոն կրակոցներ։
«Ընկերության ղեկավարությունը աշխատակիցներին տարհանելու հրատապ որոշում է կայացրել, և շուրջ 150 աշխատակից է տարհանվել»,–ասացին ընկերությունից։
Բարեբախտաբար, աշխատակիցներից ոչ ոք չի տուժել։
Հիշեցնենք` հայ–ադրբեջանական սահմանի որոշ հատվածներում իրավիճակը շարունակում է անկայուն մնալ։ Ադրբեջանի պաշտպանության նախարարությունը վերջին օրերին պարբերաբար հաղորդագրություններ է տարածում` իբր մեր զինվորականները կրակում են իրենց դիրքերի ուղղությամբ։
Ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
Հուլիսի 14-ին հայ-ադրբեջանական Երասխի հատվածում ադրբեջանական ԶՈւ ստորաբաժանումները մարտական դիրքերի առաջխաղացման նպատակով փորձել էին ինժեներական տեխնիկայի կիրառմամբ ամրաշինական աշխատանքներ իրականացնել: Հայկական կողմի՝ նշված աշխատանքները դադարեցնելուն միտված հակազդող գործողություններից հետո ադրբեջանցի զինծառայողները նշանառու կրակ էին բացել հայկական դիրքերի ուղղությամբ: Ծավալված փոխհրաձգության հետևանքով ՀՀ ԶՈւ զինծառայող էր մահացել:
Ադրբեջանի զինված ուժերը Երասխի հայկական դիրքերի ուղղությամբ կրակ էին բացել նաև հուլիսի 16-ին և 17-ին։
Հուլիսի 23-ին ադրբեջանի զինված ուժերը կրակ են բացել հայ-ադրբեջանական սահմանի Գեղարքունիքի հատվածում տեղակայված հայկական դիրքերի ուղղությամբ։
Ադրբեջանական կողմի հերթական սադրանքի հետևանքով ինտենսիվ փոխհրաձգության ժամանակ հրազենային թեթև վիրավորում են ստացել ՀՀ ԶՈւ 3 զինծառայող։
Հուլիսի 23-ին` ժամը 23:00-ի սահմանում, ՀՀ ԶՈւ ՀՕՊ ստորաբաժանումները համապատասխան գործողություններով կասեցրել են հայ-ադրբեջանական սահմանի հարավարևմտյան ուղղությամբ ԱԹՍ-ով ՀՀ օդային տարածք մուտք գործելու փորձը: