ԵՐԵՎԱՆ, 22 հուլիսի – Sputnik․ Հայաստանում կորոնավիրուսով վարակման դեպքերի թիվը շարունակում է աճել ու արդեն հատել է օրական 200 դեպքի շեմը։ Այս մասին այսօր կառավարության նիստում հայտարարեց ՀՀ առողջապահության նախարարի տեղակալ Լենա Նանուշյանը։
«Եթե նախորդ շաբաթ մենք գրանցում էինք մաքսիմում մինչև 200 դեպք, ապա այս շաբաթ մենք արդեն 200-ը հատել ենք, և երեկ հայտարարել ենք 220 դեպք, այսօր արդեն 225 դեպք է գրանցվել»,– ասաց նա` հավելելով, որ ԱՆ կանխատեսումներով` աճի նման տենդենցը շարունակվելու է նաև մոտակա օրերին։
Փոխնախարարը նշեց նաև, որ կորոնավիրուսային համաճարակային իրավիճակը լարված է ամբողջ տարածաշրջանում ու նաև Եվրոպայում։ Սակայն այն երկրներում, որտեղ պատվաստված քաղաքացիների տոկոսը բարձր է, նրա դիտարկմամբ` հոսպիտալացման ու մահվան դեպքերը հիմնականում գրանցվում են այն մարդկանց մոտ, ովքեր պատվաստված չեն։
Նանուշյանը կոչ արեց ՀՀ քաղաքացիներին պատվաստվել մինչև կորոնավիրուսի համավարակի նոր ալիքի ուժգնացումը։
Հայաստանում, պաշտանական վիճակագրության համաձայն, հիվանդանոցային բուժում է ստանում 606 քաղաքացի, որոնցից ծանր վիճակում են գտնվում 282–ը, ծայրահեղ ծանր` 48–ը։
ՀՀ վարչապետի պաշտոնակատար Նիկոլ Փաշինյանը կարևորեց պահպանել պատվաստումների իրականացումը ՀՀ քաղաքացիների շրջանում օրական 5000–ի սահմաններում։
Ի՞նչ է պետք անել պատվաստվելու համար. նախարարության ուղեցույցը
Նաև հանձնարարաեց այսուհետ առանձնացնել արտասահմանցիների ու ՀՀ քաղաքացիների պատվաստումնրի վիճակագրական ցուցանիշները, քանի որ ընդհանուր թվի մեջ ընկալելի չէ, թե դրա որ մասն է կիրառվել ՀՀ քաղաքացիների նկատմամբ։
Փաշինյանը հանձնարարեց պահպանել նաև դիմակային ռեժիմը փակ տարածքներում, քանի որ վիճակագրությունը կարող է ստիպել կառավարությանը դիմել խստացումների։
Բոլոր պատվաստանյութերն էլ չպատվաստվելուց լավ են. Նուբար Աֆեյան