ԵՐԵՎԱՆ, 19 հուլիսի – Sputnik․ ՀՀ շրջակա միջավայրի նախարարի պաշտոնակատար Ռոմանոս Պետրոսյանը Facebook-ում գրել է, որ արագիլների աղտոտման խնդիրը գտնվում է իր ղեկավարած կառույցի ուշադրության կենտրոնում։
Նա նշել է` հաշվի առնելով վերջին երկու տարվա ընթացքում արագիլների` անհայտ նյութով աղտոտման դեպքերը և այն, որ ու Բնապահպանության և ընդերքի տեսչական մարմնի ուսումնասիրությունների համաձայն, աղտոտման հավանական աղբյուր են հանդիսանում Մասիս քաղաքի աղբավայրում առկա ձկնաբուծարանների թափոնները (ձկան փորոտիքը), շրջակա միջավայրի նախարարությունը գրությամբ դիմել է տարածքային կառավարման և ենթակառուցվածքների նախարարությանը։
Գերատեսչությունը խնդրել է հետևողական լինել Մասիսի քաղաքային աղբավայրերում թափոնների սանիտարահիգիենիկ վիճակի և մասնավոր ձկնաբուծարանների կողմից աղբի թափոնների նորմերի պահպանման, ինչպես նաև այդ տարածքներում դրենաժային համակարգերի մաքրման, դրանցում կուտակվող նյութի հեռացման աշխատանքների իրականացման նկատմամբ։
Նախարարությունը գրություններ է ուղարկել նաև Արմավիրի և Արարատի մարզպետարաններ, հորդորելով՝ հետևողական լինել Արմավիրի և Արարատի մարզերում համայնքային աղբավայրերի տարածքներից դուրս նոր աղբի կուտակումների, ձկնաբուծարանների թափոնների հայտնաբերման ուղղությամբ և արձանագրված դեպքերի մասին տեղյակ պահել շրջակա միջավայրի նախարարությանն ու Բնապահպանության և ընդերքի տեսչական մարմնին։
Հիշեցնենք` արդեն երրորդ տարին է` ամռան ամիսներին ծագում է արագիլների աղտոտման թեման։ Անցյալ տարի պարզվեց` Արարատի մարզում արագիլների աղտոտման հիմնական խնդիրը եղել է այն, որ բնադրավայրերին մոտ գտնվող և գործող ձկնաբուծարաններից մեկը խոշոր ծավալներով արտանետումներ է բաց թողել։
Գերմանիայի Բնության պահպանության միության (NABU) հայաստանյան մասնաճյուղը օրերս հայտարարեց, որ ավարտել է Արարատի մարզում արագիլների հաշվառման գործընթացը։ Ուսումնասիրությունների արդյունքում պարզվել է, որ մարզի արագիլների շուրջ 60%-ն աղտոտված են։