ԵՐԵՎԱՆ, 16 հուլիսի – Sputnik. Գերմանիայի Բնության պահպանության միության (NABU) հայաստանյան մասնաճյուղը հայտարարել է, որ ավարտել է Արարատի մարզում արագիլների հաշվառման գործընթացը։
Ուսումնասիրությունների արդյունքում պարզվել է, որ մարզի արագիլների շուրջ 60%-ն աղտոտված են։
«Սա հսկայական թիվ է և խոսում է տարածաշրջանում էկոլոգիական մեծ աղետի մասին»,–ասված է կազմակերպության տարածած հաղորդագրության մեջ։
Կազմակերպությունը 2020թ–ից իրականացնում է արագիլների ուսումնասիրության և հաշվառման աշխատանքներ, որոնց նպատակն է պարզել ՀՀ–ում արագիլների տարածվածությունը, նրանց աղտոտման աղբյուրներ, պատճառներն ու աղտոտված արագիլների քանակը։
Արարատի մարզից հետո աշխատանքները շարունակվում են Արմավիրի մարզում։
Գերմանիայի Բնության պահպանության միության հայաստանյան գրասենյակը խոստանում է առաջիկայում ներկայացնել ուսումնասիրությունների վերջնական տվյալները, որոնք ցույց կտան աղետի իրական չափերն ու մասշտաբները։
«Դե, գնա, գնա». Կարմիր գրքում գրանցված սև արագիլին բնություն են վերադարձրել
Հիշեցնենք` արդեն երրորդ տարին է` ամռան ամիսներին ծագում է արագիլների աղտոտման թեման։ Անցյալ տարի պարզվեց` Արարատի մարզում արագիլների աղտոտման հիմնական խնդիրը եղել է այն, որ բնադրավայրերին մոտ գտնվող և գործող ձկնաբուծարաններից մեկը խոշոր ծավալներով արտանետումներ է բաց թողել։