ԵՐԵՎԱՆ, 15 հուլիսի - Sputnik. Վերջին երկու ամիսներին Հայաստանը հայ–ադրբեջանական սահմանին երկու զոհ է ունեցել։ Այս մասին այսօր կառավարության նիստում հիշեցրեց ՀՀ վարչապետի պաշտոնակատար Նիկոլ Փաշինյանը` ցավակցություն հայտնելով զոհերի հարազատներին` միաժամանակ նաև ՀԱՊԿ և ԵԱՀԿ ՄԽ համանախագահ երկրների գործընկերների ուշադրությւնը հրավիրելով այդ փաստի վրա։
«Ի հեճուկս իր ստանձնած պարտավորությունների՝ Ադրբեջանը մինչ օրս չի վերադարձրել մեր ռազմագերիներին։ Ամեն դեպքում, միջազգային մեր գործընկերների հետ համագործակցությամբ մենք կարողացել են վերադարձնել մեր 104 ռազմագերիներին։ Մենք շարունակելու ենք աշխատել մեր բոլոր ռազմագերիներին վերադարձնելու ուղղությամբ։ ԼՂ հարցի համապարփակ կարգավորման, սահմանների սահմանազատման և սահմանագծման աշխատանքները, տարածաշրջանային կոմունիկացիաների բացումը կան և եղել են մեր առաջնահերթությունների շարքում»,– ասաց Փաշինյանը։
Նրա խոսքով, Ադրբեջանն իր ապակառուցողական հայտարարություններով խախտում է 2020թ–ի նոյեմբերի 9-ի եռակողմ պայմանավորվածությունը։ Միաժամանակ դրանք մարտահրավեր են միջազգային բոլոր այն ուժերին, որոնք շահագրգռված են տարածաշրջանում խախղաղության ու կայունության հաստատմամբ։
Ադրբեջանը ամեն ինչ անում է խաղաղությանը խոչընդոտելու համար. Փաշինյանը պատասխանեց Ալիևին
Հիշեցնենք՝ Ադրբեջանի նախագահ Իլհամ Ալիևը հուլիսի 14-ին հայտարարել էր, թե «նոյեմբերի 10-ի եռակողմ հայտարարության մեջ ասվում է. բոլոր փախստականները պետք է վերադառնան իրենց հայրենի հողերը։ Մեր հայրենի հողերը Զանգեզուրն է, մեր հայրենի հողերը Գյոյչան է (Սևան), Իրեվանը (Երևան): Մենք, իհարկե, կվերադառնանք» ու ավելացրել, որ ամեն րոպե պետք է պատրաստ լինել պատերազմի։