ԵՐԵՎԱՆ, 12 հուլիսի – Sputnik. «Զարթոնք» ազգային-քրիստոնեական կուսակցության գործադիր մարմնի ղեկավար Արա Զոհրաբյանն այսօր Սահմանադրական դատարանում Կենտրոնական ընտրական հանձնաժողովի նախագահ Տիգրան Մուկուչյանին հարցեր ուղղելիս հետաքրքրվեց, թե ՀՀ վարչապետի պաշտոնակատար Նիկոլ Փաշինյանի հետ վերջին անգամ ե՞րբ են կապի մեջ եղել՝ անձամբ հանդիպման, հեռախոսի կամ կապի այլ միջոցներով։
Մուկուչյանը նշեց, որ երբեք կապի մեջ չի եղել նրա հետ, ոչ էլ խոսել է։
Զոհրաբյանը շարունակեց` նշելով, որ հունիսի 10-ին մամուլում այսպիսի տեղեկություն է տեղ գտել, որ «Նիկոլ Փաշինյանի և Տիգրան Մուկուչյանի միջև քաշքշուկ է եղել»։
Մուկուչյանն անգամ թույլ չտվեց, որ Զոհրաբյանն ավարտի հարցը։
«Բացարձակ ու լկտի սուտ է»,–ասաց Մուկուչյանը։
Հիշեցնենք՝ 4-րդ օրն է՝ Սահմանադրական դատարանում քննվում է ԱԺ արտահերթ ընտրությունների արդյունքների վիճարկման գործը:
«Հայաստան» դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի` ընտրությունների արդյունքներն անվավեր ճանաչելու դիմումներով գործերը ՍԴ-ում միավորել են ու քննում են նույն նիստում։
ՍԴ-ից հայտնել էին, որ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։ Այս գործով դատաքննությունը սկսվել է հուլիսի 9-ից։
«Հայոց հայրենիք» կուսակցությունը անվճար 90 րոպե եթերաժամից օգտագործել է 13-ը
«Զարթոնք» ազգային քրիստոնեկան կուսակցությունն առանձնացրել է Սահմանադրությամբ ամրագրված ընտրական իրավունքի հիմնական սկզբունքների՝ ազատության և հավասարության խախտումները, ընտրողների կամքի ազատ ձևավորման և արտահայտման վրա էական ազդեցություն գործադրելը, քվեարկության գաղտնիությունը խախտելը, ընտրողներին ուղղորդելը և նրանց կուտակումները, պետական գործառույթների և կուսակցական շահերի միահյուսումը և այլն:
Չեն կարողանում զսպել էմոցիաները. Դավիթ Հարությունյանը` Սերժ Սարգսյանի հայհոյանքի մասին