2 երկրաշարժ` մեկ օրում. Հայաստանի հետ Վրաստանի և Նախիջևանի սահմանային գոտիները ցնցվել են

Երկրաշարժերըը զգացվել են Վայոց ձորի մարզի Ռինդ, Ելփին, Չիվա և Արենի գյուղերում և Շիրակի մարզի Բավրա, Աշոցք և Լոռու մարզի Մեծավան գյուղերում։
Sputnik

ԵՐԵՎԱՆ, 11 հուլիսի – Sputnik. Հայաստան-Նախիջևան սահմանային գոտում երկրաշարժ է գրանցվել։ Տեղեկությունը հայտնում են ՀՀ ԱԻՆ մամուլի ծառայությունից։

Երկրաշարժ Տաջիկստանում. կան զոհեր

«Հուլիսի 11-ին, տեղական ժամանակով ժամը 15:27-ին (Գրինվիչի ժամանակով` ժամը 11:27-ին) ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 39.72⁰ և արևելյան երկայնության 45.20⁰ աշխարհագրական կոորդինատներով` Հայաստան-Նախիջևան սահմանային գոտի` Վայոց ձորի Ելփին գյուղից 12 կմ հարավ-արևելք, օջախի 10 կմ խորությամբ, 2.8 մագնիտուդով երկրաշարժ»,–ասված է հաղորդագրության մեջ:

Էպիկենտրոնային գոտում ստորգետնյա ցնցման ուժգնությունը կազմել է 3-4 բալ:

Երկրաշարժը զգացվել է Վայոց ձորի մարզի Ռինդ, Ելփին, Չիվա և Արենի գյուղերում` 3 բալ ուժգնությամբ։

Մինչ այդ այսօր` ժամը 14:42-ին (Գրինվիչի ժամանակով` ժամը 10:42-ին) ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել էր հյուսիսային լայնության 41.14⁰ և արևելյան երկայնության 43.95⁰ աշխարհագրական կոորդինատներով` Հայաստան-Վրաստան սահմանային գոտի` Շիրակի մարզի Բավրա գյուղից 12 կմ հյուսիս-արևելք, օջախի 10 կմ խորությամբ, 3 մագնիտուդով երկրաշարժ:

Էպիկենտրոնային գոտում ստորգետնյա ցնցման ուժգնությունը կազմել է 4 բալ:

Երկրաշարժը զգացվել է Շիրակի մարզի Բավրա, Աշոցք և Լոռու մարզի Մեծավան գյուղերում` 3 բալ ուժգնությամբ:

Նշենք, որ հուլիսի 8–ին էլ մեկ օրվա ընթացում 2 երկրաշարժ էր գրանցվել Հայաստանում։ Առաջինը տեղական ժամանակով 14:03-ին, ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցը երկրաշարժ էր գրանցել Վրաստան-Հայաստան սահմանային գոտում։ Երկրորդը գրացվել էր 17։38–ին, Շիրակի մարզի Բավրա գյուղից 13 կմ հյուսիս-արևելք ընկած տարածքում։