ԵՐԵՎԱՆ, 9 հուլիսի – Sputnik. ԱՄՆ նախագահ Ջո Բայդենն ու ՌԴ նախագահ Վլադիմիր Պուտինը հեռախոսազրույց են ունեցել, հաղորդում է Սպիտակ տան մամուլի ծառայությունը: Զրույցը տևել է շուրջ մեկ ժամ:
ԱՄՆ և ՌԴ նախագահները քննարկել են կիբերհարձակումների ծրագրային շորթումներից պաշտպանվելու հարցերը։ Ըստ Սպիտակ տան ղեկավարի, նման կիբերհարձակումներն իրականացնում են «Ռուսաստանում դիրքավորված» կիբերհանցագործները: Բայդենի խոսքով ՝ ԱՄՆ–ը կկիրառի ցանկացած միջոց իր քաղաքացիներին ու կենսական կարևոր ենթակառուցվածքները հաքերներից պաշտպանելու համար:
Ամերիկացի առաջնորդն իր գործընկերոջն է փոխանցել ԱՄՆ 16 կազմակերպության ցանկ, որոնք համարվում են կարևոր ենթակառուցվածքներ և որոնց վրա հարձակումները Վաշինգտոնն անընդունելի է համարում:
Բայդենն ասել է, որ «հիմնական կանոնների» խախտման պարագայում ԱՄՆ–ը պատրաստ է պատասխան տալ, բայց բացառել է ռազմական ուժի կիրառման տարբերակը։
Վլադիմիր Պուտինը հակառակը` պնդել է, որ աշխարհում կիբերհարձակումների մեծ մասն իրականացվում է ԱՄՆ-ից, և որ հակառուսական ակնարկներն այս դեպքում հարկ է դադարեցնել։
«Նա լրիվ թեմայի մեջ է»․ Պուտինն ասել է`մամուլը շատ է աղավաղում Բայդենի կերպարը
Նա նաև շեշտել է, որ Մոսկվան նախկինում էլ կիբերհարձակումների վերաբերյալ ամբողջական տեղեկատվություն է տրամադրել ամերիկյան հատուկ ծառայությունների հարցումներին ի պատասխան։ Բայց որևէ փոխադարձ տեղեկություն ամերիկյան հատուկ ծառայություններից չի ստացել:
Կողմերն անդրադարձել են նաև Սիրիայում տիրող իրավիճակին։ Նրանք բարձր են գնահատել իրենց թիմերի աշխատանքը ԱՄՆ-Ռուսաստան գագաթնաժողովից հետո, որի արդյունքում ՄԱԿ-ի Անվտանգության խորհրդում միաձայն որոշում է կայացվել վերականգնել անդրսահմանային հումանիտար օգնության տրամադրումը Սիրիային։