Գոհար Մելոյանի խոսքով` դատավորների թվակազմի ավելացմամբ խորքային խնդիրներ չեն լուծվի։ Ըստ նրա` ստեղծվել է փակ շրջան, այսինքն` ոչ միայն մայրաքաղաքի ընդհանուր իրավասության և մարզային դատարաններում են նախատեսում ավելացնել միջդատական գործերի վարույթով դատավորների հաստիքները, այլև նախատեսում են ևս երեք հաստիք ավելացնել Վերաքննիչ դատարանում, որպեսզի գործերը վերանայող դատավորները բավարարեն իշխանությունների միջնորդությունները և առաջին ատյանի դատարանի որոշումները վերաքննության արդյունքում մնան նույնը։
«Այս մեխանիզմը մտահոգիչ է, որովհետև կոնկրետ գործընթացներին հաջորդած քայլ էր, հետևաբար տվյալ նորամուծությունը շահարկվելու է քաղաքական նպատակներով։ Ունենք իրավիճակ, երբ նալն էլ է իրենց ձեռքում, մուրճն էլ, ուստի ինչպես ցանկանան, այնպես էլ կանեն։ Առաջին անգամ չէ, որ ականատես ենք լինում ոչ կոմպետենտ մոտեցման, երբ զուտ քաղաքական հայացքներից ելնելով` մարդկանց նշանակում են բարձր պաշտոնների։ Արդեն իսկ հայտնել եմ իմ մտավախությունն առ այն, որ դատավորների նոր հաստիքները ստեղծվում են քաղաքական վերահսկողություն իրականացնելու նպատակով»,– Sputnik Արմենիային ասաց իրավագետը։
Մելոյանի կարծիքով` նախորդ երեք տարիներին տեղի ունեցած իրավաքաղաքական գործընթացներում իշխանության և ընդդիմության միջև կոնսենսուս չձևավորվեց, իսկ կոնկրետ դատական իշխանության թևում հետայսու նույնպես ականատես ենք լինելու տարաբնույթ անթույլատրելի իրավիճակների։
«Նոր հաստիքներով նշանակվող դատավորների համար նախատեսված էր շատ կարճ վերապատրաստում արդարադատության ակադեմիայում, ինչը ևս խնդրահարույց է, այսինքն հիմնական միտումն այն է, որ իշխանահաճո մասնագետներ նշանակվեն դատավորների նոր հաստիքներին»,– նշեց իրավագետը։
Ըստ Մելոյանի` կարելի էր հուսալ, որ ամեն ինչ իրավական պետության շրջանակներում կարվեր, այդ թվում նոր դատավորների նշանակումը, սակայն առկա է երեք տարվա նախադեպը, ինչի հիման վրա անշնորհակալ գործ է նման ակնկալիք ունենալը, և 20 նոր դատավորները, Մելոյանի համոզմամբ, հնարավորինս իշխանահաճո և կամակատար են լինելու։
Ամեն անգամ հետքայլ ենք արձանագրում. Այվազյանը`սահմանադրական փոփոխությունների մասին
Հիշեցնենք` ՀՀ արդարադատության նախարարի պաշտոնակատար Ռուստամ Բադասյանն այսօր կառավարության նիստում հայտնեց, որ hայաստանյան դատարաններում աշխատող դատավորների թիվն առաջիկայում կավելանա 20–ով։ Նրա խոսքով` դատավորների թվակազմն ավելացնելու համար ԲԴԽ–ն կառավարությանը դիմել էր հունիսի 30-ին։
Մասնավորապես առաջարկվում է Երևանի ընդհանուր իրավասության առաջին ատյանի դատարանի դատավորների կազմն ավելացնել 8 դատավորով, մարզերում յուրաքանչյուր դատարանում դատավորների թվակազմն ավելացնել 1-ական դատավորով և ՀՀ Վերաքննիչ քրեական դատարանում` 3-ով, և կատարել վերաբաշխում` ՀՀ պետական բյուջեում ապահովելով 20 դատավորների համար նախատեսված ծախսերը։
Սահմանադրությունը կփոխվի՞. Ավինյանը հայտնում է, որ առաջիկայում լայն քննարկումներ կլինեն