ԵՐԵՎԱՆ, 6 հուլիսի - Sputnik. Այսօր Գեղարքունիքի մարզի Վերին Շորժայի սահմանային հատվածում փոխհրաձգության հետևանքով երկու զինծառայող են վիրավորվել։ Հանրային հեռուստաընկերության եթերում լուրը հայտնեց ՀՀ ԱԽ քարտուղար Արմեն Գրիգորյանը։
Նրա խոսքով՝ սա Ադրբեջանի կազմակերպած հերթական սադրանքն է։ Հայ զինծառայողները, բարեբախտաբար, թեթև վիրավորում են ստացել։
«Մեր կարծիքով` նաև որոշ հայտարարություններ, որոնք մինչև այս հնչել են ՀԱՊԿ-ի կողմից, հնարավոր է նաև, որ սրանք են որոշակի ձևով ազդել։ Որովհետև մեր հիմնական անհանգստությունը պարոն Զասի տված հարցազրույցի այն էր, որ խաղաղ հանգուցալուծման գործընթացի վրա կարող են ոչ կառուցողական հայտարարությունները բացասական ազդեցություն ունենալ։ Կարծում ենք, որ Ադրբեջանին նման հայտարարությունները պրովոկացիայի դիմելու որոշակի հիմքեր են տալիս, և նաև դա է պատճառը, որ մենք քննարկումներ ենք սկսել, որ բացառենք հետագայում նման հայտարարությունները»,- նշեց Գրիգորյանը։
ԱԽ քարտուղարի խոսքով՝ սահմանի կայունությունն այս պահին փխրուն է։ Մեծ ջանքեր են գործադրվում, որպեսզի այնպիսի միջավայր ու պայմաններ ստեղծվեն, որ հնարավոր լինի հետագայում խուսափել նման միջադեպերից։
«Էս պահին կոնկրետ բանակցություններ են ընթանում սահմանին ռուսական սահմանապահ ուժեր տեղակայելու և նման միջադեպերը բացառելու համար։ Գործընթացը սկսվել է, այս պահին դեռ չենք կարողացել հասնել ամբողջական լուծման, բայց հույս ունենք, որ բանակցությունները կկարողանանք շարունակել և մոտ ապագայում կունենանք մի այնպիսի իրավիճակ, որ այն տարածքում, որտեղ մայիսի 12-ից ճգնաժամ է սկսվել, տեղակայվեն ռուսական սահմանապահ զորքերը, այնուհետև լինի սահմանազատում և սահմանագծում»,- հայտարարեց ԱԽ քարտուղարը։
Գրիգորյանը հստակեցրեց՝ խոսքը Սև լճից մինչև Շորժա սահմանային հատվածի մասին է։
Ավելի վաղ տեղեկացրել էինք, որ Գեղարքունիքի մարզի Վերին Շորժա գյուղի սահմանային հատվածում Ադրբեջանը փոխհրաձգություն է հրահրել: Sputnik Արմենիայի հետ զրույցում Զինված ուժերի գլխավոր շտաբի վարչական ապարատի տեղեկատվական բաժնի պետ, գնդապետ Սամվել Ասատրյանը հայտնել էր, որ հայ-ադրբեջանական սահմանի Գեղարքունիքի հատվածում հայ և ադրբեջանցի զինծառայողների միջև փոխհրաձգություն է տեղի ունեցել:
Հայկական կողմն, ըստ Ասատրյանի, ունի մեկ թեթև վիրավորում ստացած զինծառայող, ադրբեջանական կողմը` երկու վիրավոր զինծառայող:
Նշենք, որ ադրբեջանցի զինվորականները մայիսի 12-ից Հայաստանի Սյունիքի մարզի Սև լճի տարածքում և Գեղարքունիքի մարզի Կութ, Նորաբակ ու Վերին Շորժա գյուղերի սահմանային տարածքներում ներխուժել են ՀՀ ինքնիշխան տարածք ու փորձում են ամրապնդվել այնտեղ։ Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն չունի։ Հայաստանը դիմել է ՀԱՊԿ-ին և ռազմական օգնություն խնդրել Ռուսաստանից։
Սահմանների հստակեցումը լինելու է բացառապես մեր հաշվին. ի՞նչ է ստանալու Հայաստանը դրա դիմաց
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցություններն արդյունք չտան։
Ստեղծված իրավիճակը չի կարելի որակել որպես միջադեպ. Արմեն Գրիգորյանը` ՀԱՊԿ քարտուղարին
Մայիսի 25-ին Գեղարքունիքի մարզի Վերին Շորժա գյուղի հատվածում հակառակորդի կողմից արձակված կրակոցներից սպանվել է զինծառայող, կրտսեր սերժանտ Գևորգ Խուրշուդյանը: