ԵՐԵՎԱՆ, 2 հուլիսի – Sputnik. ՀՀ հատուկ քննչական ծառայությունը բացահայտել է Երևանի Մալաթիա-Սեբաստիա վարչական շրջանում «Պատիվ ունեմ» դաշինքի օգտին քվեարկությունների դիմաց ընտրողներին կաշառելու դեպքեր:
Ինչպես նշված է նախաքննական մարմնի տարածած հաղորդագրության մեջ, կաշառքն ընտրողներին տվել է վարչական շրջանի համատիրություններից մեկի կառավարիչ Վ.Վ.-ն՝ նույն համատիրության հաշվապահ Շ.Դ.-ի օժանդակությամբ:
2021 թվականի հունիսի 5-ին Վ.Վ.-ն հանդիպել է բնակիչներից մեկին ու նրան 20.000 ՀՀ դրամ կաշառք տվել ՝ ընտրություններին մասնակցելու և «Պատիվ ունեմ»-ի օգտին քվեարկելու համար: Իսկ Շ.Դ.-ն ընտրողի վերաբերյալ տեղեկատվություն է տրամադրել Վ.Վ.-ին ու պատրաստակամություն հայտնել հանդիպել ու նույն հարցի շուրջ զրուցել ընտրողի կնոջ հետ:
Ընտրողին տրված 20.000 ՀՀ դրամը նախաքննության ընթացքում նրա մոտ հայտնաբերվել ու առգրավվել է:
Բացի այդ, Վ.Վ.-ն Շ.Դ.-ի օժանդակությամբ 2021 թվականի հունիսի 5-ին կաշառք է առաջարկել նույն վարչական շրջանի մեկ այլ բնակչի: Շ.Դ.-ի խորհրդով Վ.Վ.-ն հանդիպել է ընտրողի հետ և վերջինիս առաջարկել 20.000 ՀՀ դրամ կաշառք՝ ընտրությանը մասնակցելու և «Պատիվ ունեմ»-ի օգտին քվեարկելու համար, սակայն ընտրողը հրաժարվել է:
«Ինչու էր որոշվել, որ լիքը ոստիկան Երևանից պետք է գնա Սյունիք՝ քվեարկի». Վարդևանյան
Բացահայտված այս արարքների համար Վ.Վ.-ին մեղադրանք է առաջադրվել ՀՀ քրեական օրենսգրքի 154.2-րդ հոդվածի 4-րդ մասի 2-րդ կետով, իսկ Շ.Դ.-ին` 38-154.2-րդ հոդվածի 4-րդ մասի 2-րդ կետով (մի խումբ անձանց կողմից նախնական համաձայնությամբ ընտրողներին կաշառք տալը): Նրանց նկատմամբ որպես խափանման միջոց է ընտրվել կալանավորումը:
109 տեղամաս, 88 000 ընտրողի ձայն. «Հայաստան» դաշինքը ներկայացրել է ՍԴ-ի հայցի մանրամասները
Հիշեցնենք, որ հունիսի 20–ին կայացած ԱԺ արտահերթ ընտրությունների ընտրություններում անցողիկ շեմը հաղթահարել են ՔՊ-ն (53.92%) ու «Հայաստան» դաշինքը (21.04%)։ «Պատիվ ունեմ» դաշինքն էլ (5.23%) խորհրդարան կանցնի իրավունքի ուժով՝ որպես երրորդ ամենաշատ ձայներ ստացած քաղաքական ուժ։