ԵՐԵՎԱՆ, 2 հուլիսի – Sputnik. Սյունիքի մարզի Շուռնուխ և այլ համայնքներում հունիսի 20-ին կայացած արտահերթ խորհրդարանական ընտրությունների ժամանակ Երևանից ոստիկանության բազմաթիվ ծառայողներ են քվեարկել:
Այս մասին այսօր հրավիրված մամուլի ասուլիսում հայտնեց ՀՀ երկրորդ նախագահ Ռոբերտ Քոչարյանի ղեկավարած «Հայաստան» դաշինքի պաշտոնական ներկայացուցիչ Արամ Վարդևանյանը:
«Սա հրապարակված փաստ է: Այսինքն՝ մուտք ենք գործում elections.am-ի «արտահերթ ընտրություններ» բաժնում հրապարակված «ստորագրված ընտրողների ցուցակներ» բաժինը և տեսնում ենք՝ Սյունիքում բազմաթիվ են իրենք: Ես չգիտեմ՝ ինչու էր որոշվել, որ լիքը ոստիկան Երևանից պետք է գնա Սյունիք՝ քվեարկի»,- ասաց Վարդևանյանը՝ հավելելով, որ այդ հարցի հասցեատերն ինքը չէ, այլ ոստիկանությունը:
Այս փաստն առաջիկայում ևս ներկայացվելու է Սահմանադրական դատարանում «Հայաստան» դաշինքի հայցի քննության ժամանակ:
Ռոբերտ Քոչարյանը մեկուկես տարուց նոր խորհրդարանական ընտրություններ է կանխատեսում
Հիշեցնենք, որ ՀՀ երկրորդ նախագահ Ռոբերտ Քոչարյանի ղեկավարած «Հայաստան» դաշինքը Սահմանադրական դատարան է դիմել 12 կետանոց դիմումով` 109 ընտրական տեղամասերի վերաբերյալ, ընտրողների շուրջ 88 000 ձայների շուրջ, որոնցից 4000-ի դիմաց դաշինքի անդամներն արձանագրել են, որ ընտրողների ցուցակում բացակայում են ստորագրությունները:
Հիունիսի 20–ին Հայաստանում կայացան արտահերթ խորհրդարանական ընտրություններ։ Ընտրողների ցուցակներում ընդգրկված 2 593 572 քաղաքացուց ընտրությանը մասնակցեցին 1 281 174–ը կամ 49.4 տոկոսը։
Խորհրդարանական արտահերթ ընտրություններում անցողիկ շեմը հաղթահարել են ՔՊ-ն (53.91%) ու «Հայաստան» դաշինքը (21.09%)։ «Պատիվ ունեմ» դաշինքն էլ (5.23%) խորհրդարան կանցնի իրավունքի ուժով՝ որպես երրորդ ամենաշատ ձայներ ստացած քաղաքական ուժ։