ԵՐԵՎԱՆ, 2 հուլիսի – Sputnik. «Հայաստան» դաշինքն այսօր դիմել է Սահմանադրական դատարան` ընտրությունների արդյունքներն անվավեր ճանաչելու հարցով։ Իրավաբան, «Հայաստան» դաշինքի ներկայացուցիչ Ռոբերտ Հայրապետյանը Sputnik Արմենիայի հետ զրույցում նշեց, որ իրենց դիմումն արդեն ՍԴ–ում է և սպասում են դիմումը վարույթ ընդունելու վերաբերյալ աշխատակարգային որոշմանը։
«ՍԴ մասին օրենքի համաձայն` գործը քննվելու է 15–օրյա ժամկետում։ Գործը կքննվի բանավոր ընթացակարգով, այսինքն` բաց, և հնարավորություն կունենանք ներկա գտնվել կամ հետևել։ Ամենաուշը հուլիսի 16-ին մենք կունենանք ՍԴ որոշում` կա՛մ ընտրության արդյունքները թողնել անփոփոխ, կա՛մ անվավեր ճանաչել դրանք, կա՛մ անվավեր ճանաչել և սահմանել մանդատների ճանաչման նոր կարգ, կա՛մ անվավաեր ճանաչել և նշանակել ընտրությունների երկրորդ փուլ»,–ասաց Հայրապետյանը։
Նա հավելեց, որ դաշինքն անհատական դիմում է ներկայացրել, մամուլից տեղեկացել է, որ անհատապես դիմումներ են ուղարկելու նաև «Պատիվ ունեմ» դաշինքը և «Զարթոնք» կուսակցությունը։ Հայրապետյանը հավելեց` սահմանված ժամկետում նույնաբովանդակ դիմումներ ստանալու դեպքում ՍԴ–ն դրանք միավորելու և մեկ դիմումի շրջանակում է քննելու։
ՍԴ–ում կքննարկվի մանդատների բաշխման կարգը. ինչ հարցով է «Հայաստան» դաշինքը դիմելու
Հարցին, թե ի վերջո ՀՀ երկրորդ նախագահը պատրաստվո՞ւմ է վերցնել իր պատգամավորական մանդատը` Հայրապետյանը պատասխանեց, որ ՍԴ որոշումից հետո էլ ամեն ինչ պարզ կլինի։
ՍԴ մամուլի քարտուղար Եվա Թովմասյանն էլ Facebook–ի իր էջում գրել է, որ ՍԴ–ն ստացել է «Հայաստան» դաշինքի դիմումը։ Նրա խոսքով` այսր ժամը 10։40 -ի դրությամբ ընտրությունների արդյունքների հետ կապված այլ դիմումներ չեն ներկայացվել։
Հիշեցնենք, որ հունիսի 20-ին կայացած խորհրդարանական արտահերթ ընտրություններում անցողիկ շեմը հաղթահարել են ՔՊ-ն (53.92%) ու «Հայաստան» դաշինքը (21.04%)։ «Պատիվ ունեմ» դաշինքն էլ (5.23%) խորհրդարան կանցնի իրավունքի ուժով՝ որպես երրորդ ամենաշատ ձայներ ստացած քաղաքական ուժ։
Ինչպես է ՍԴ–ն լուծում ընտրությունների արդյունքներով ընդունված որոշման հետ կապված վեճերը