ԵՐԵՎԱՆ, 1 հուլիսի – Sputnik. ՀՀ վարչապետի պաշտոնակատար Նիկոլ Փաշինյանը ՊՊԾ կազմավորման օրվան նվիրված հանդիսավոր նիստում հայտարարել է, որ ԱԱԾ Պետական պահպանության ծառայությունը մեր երկրի կարևոր ինստիտուտներից մեկն է: Տեղեկությունը հայտնում է վարչապետի մամուլի ծառայությունը։
«Հայաստանի պարագայում դա հատկապես ընդգծվում է, որովհետև ցավոք մեր երկրում տեղի են ունեցել այնպիսի իրադարձություններ, ինչպիսին 1999 թվականի հոկտեմբերի 27-ն է: Նաև վերջին ամիսներին Պետական պահպանության ծառայության կարևորությունը ընդգծվեց»,- ասել է նա:
Փաշինյանը նշել է, որ պետության և պետական ինստիտուտների անվտանգության ապահովումը մեր երկրի կարևորագույն խնդիրներից է, իսկ այժմ, երբ մեր պատմության մեջ բոլորովին նոր փուլ է բացվել` աղետաբեր պատերազմից, բախումների ճգնաժամերից հետո ի վերջո կարող ենք խոսել ապագայի նկատմամբ մեր լավատեսությունը փշուր-փշուր վերականգնելու մասին:
Վարչապետի պաշտոնակատարի խոսքով՝ այս ընթացքում վեր են հանվել Պետական պահպանության ծառայության աշխատանքում եղած բացթողումներն ու խնդիրները և դրանց լուծման ճանապարհները:
«Այս պահին համոզված եմ մի բանում` Պետական պահպանության ծառայության և նրա ստորաբաժանումների ղեկավարությունը կոմպետենտ է, իրավասու է կատարել իր առջև դրված խնդիրները: Եվ մենք միասին պետք է մեր առաջ դրված խնդիրը լուծենք. այն է՝ ապահովենք Պետական պահպանության ծառայության ինստիտուցիոնալ զարգացումը: Այն ինչպես եղել, այնպես էլ շարունակելու է լինել մեր երկրի անվտանգության ապահովման կարևոր հենասյուներից մեկը»,- շեշտել է Փաշինյանը:
Վարչապետի պաշտոնակատարն ընդգծել է, որ Պետական պահպանության ծառայության գործունեության ոլորտում եղել են նաև անցանկալի դրսևորումներ, որի առանցքային պատճառներից մեկն այն էր, որ Պետական պահպանության ծառայության անձնակազմի մեծ մասը նոյեմբերի դրությամբ գտնվում էր Հայրենիքի սահմանների պաշտպանության դիրքերում:
Վարչապետի պաշտոնակատարը շնորհակալություն է հայտնել ներկաներին ծառայության համար և մաղթել, որ մարտահրավերները ոչ թե ահագնանան, այլ մեղմվեն, միաժամանակ ընդգծել, որ ՊՊԾ-ն, ԱԱԾ-ն պիտի պատրաստ լինեն կառավարել, կանխել ցանկացած մարտահրավեր։
Ծառայողական պարտականությունները կատարելիս ցուցաբերած նվիրումի համար ՀՀ ԱԱԾ պետական պահպանության ծառայության մի խումբ աշխատակիցներ վարչապետի պաշտոնակատար Նիկոլ Փաշինյանի կողմից պարգևատրվել են Մարտական ծառայության մեդալով, Վարչապետի հուշամեդալով և խրախուսվել վարչապետի շնորհակալագրով: