ԵՐԵՎԱՆ, 1 հուլիսի – Sputnik. Լոս Անջելես քաղաքի ու USC հայագիտական ինստիտուտի համագործակցության արդյունքում Հարավարևելյան Սան Ֆերնանդո հովտում կհիմնադրվի ԱՄՆ առաջին «Թումո» կենտրոնը։ Տեղեկությունը հայտնել են «Թումո» ստեղծարար տեխնոլոգիաների կենտրոնի հաղորդակցման բաժնից։
«Բացի այս, 1 միլիոն դոլար կտրամադրվի Հարավային Կալիֆոռնիայի համալսարանի հայագիտական հետազոտությունների ինստիտուտին, ևս 1 միլիոն դոլար՝ Lark Musical Society-ին, որն ապահովում է բարձրորակ դասական երաժշտական կրթություն»,- նշված է հաղորդագրության մեջ:
Կալիֆոռնիայի օրենսդիր մարմնի ստորին պալատի անդամ Ադրին Նազարյանը հայտնել է, որ ծրագիրն իրականացնելու համար հատկացվելու է 9 միլիոն դոլար։
Նա արձանագրել է, որ Կալիֆոռնիան աջակցում է երեք կազմակերպությունների առաքելությանը, որոնք շարունակաբար ապացուցում են իրենց ձգտումն ու արդյունավետությունը մեր երիտասարդներին կրթելու և նրանց ապագային միտված ներդրումներ կատարելու հարցում։
Մոսկվայում «Թումո» միջազգային կենտրոն է բացվել. Հակոբ Արշակյանը լուսանկարներ է հրապարակել
«Լինի դա արվեստ, կրթություն, թե տեխնոլոգիա, այս երեք կազմակերպություններն էլ ցույց են տվել, որ օգնում են մեր ուսանողներին հաջողության հասնել ու զգալիորեն զարգացնում և ընդլայնում են երիտասարդ սերունդների կրթական, ինչպես նաև մասնագիտական փորձառությունը», - ասել է Նազարյանը:
Ըստ աղբյուրի՝ Սան Ֆերնանդոյի հովտում հիմնադրվող «Թումո» կենտրոնը կգործի անվճար հիմունքներով և բաց կլինի 12-18 տարեկան պատանիների համար։