ԵՐԵՎԱՆ, 1 հուլիսի– Sputnik. Ուկրաինայում Հայաստանի Հանրապետության նորանշանակ դեսպան Վլադիմիր Կարապետյանը հուլիսի 1-ին հավատարմագրերի պատճենը հանձնել է Ուկրաինայի արտաքին գործերի նախարարի տեղակալ Վասիլ Բոդնարին։ Տեղեկությունը հայտնում է դեսպանությունը։
«Արարողակարգային շփումից հետո տեղի է ունեցել հայ-ուկրաինական երկկողմ հարաբերություններին վերաբերող, համատեղ հետաքրքրություն ներկայացնող մի շարք հարցերի քննարկում։ Կողմերը հաստատակամություն են հայտնել հնարավորինս արդյունավետ համագործակցության, արդի օրակարգի պայմաններում երկու երկրների հարաբերությունների խորացման ուղղությամբ»,- նշված է դեսպանատան տարածած հաղորդագրության մեջ։
Կարապետյանը հանդիպում է ունեցել նաև Ուկրաինայի արտաքին գործերի նախարար Դմիտրո Կուլեբայի հետ։
Նախարարը պատրաստակամություն է հայտնել նպաստել Հայաստանի հետ հարաբերությունների զարգացմանը բոլոր ոլորտներում։
Կուլեբան շնորհավորել է խորհրդարանական ընտրություններում «Քաղաքացիական պայմանագիր» կուսակցության համոզիչ հաղթանակի կապակցությամբ և վստահություն հայտնել, որ Հայաստանը կշարունակի ժողովրդավարական բարեփոխումները։
Հիշեցնենք` Կարապետյանը Ուկրաինայում ՀՀ դեսպան էր նշանակվել հունիսի 1-ին` Նիկոլ Փաշինյանի առաջարկությամբ և ՀՀ նախագահի հրամանագրով` 3 տարի ժամկետով (նստավայրը՝ Կիև)։ Մինչ այդ նա Փաշինյանի խոսնակն էր։