Դրամի արժևորումն ու դոլարի փոխարժեքի նվազումը կարճաժամկետ բնույթ է կրում։ Sputnik Արմենիայի հետ զրույցում նման կարծիք հայտնեց տնտեսագետ Սուրեն Պարսյանը։
«Այս պահին մեր տնտեսության մեջ չկան արմատական, կառուցվածքային փոփոխություններ, և այն գործոնները, որոնք ազդել են դոլար-դրամ փոխարժեքի վրա, կարճաժամկետ են, ու որոշակի սպեկուլյատիվ էֆեկտ կա այստեղ»,- ասաց նա։
Փոխարժեքի տատանման վրա ազդեցություն է ունեցել արտահանման ծավալների մոտ 20 տոկոսանոց աճը, որին նպաստել են հիմնականում հանքահումքային արտադրանքի ծավալները, համաշխարհային շուկայում պղնձի գների բարձրացումը, զբոսաշրջային հոսքերը, գյուղատնտեսական մթերքների արտահանումը։
«Դրան գումարվել է նաև այն, որ այս տարվա 4 ամիսների հաշվարկով գործող կառավարությունը 804 միլիոն դոլարի պարտք է ավելացրել, պետական պարտատոմսերով դոլար է բերել Հայաստան և հիմա էլ դոլարը ներարկում է տնտեսության մեջ, բնականաբար սա էլ է ազդում փոխարժեքի վրա»,- նշեց Պարսյանը։
Նրա խոսքով` վերջին ամիսների ընթացքում ԿԲ-ն փորձում էր դոլարի նկատմամբ պահանջարկը նվազեցնել, շարունակաբար դոլար էր «ներարկում» տնտեսության մեջ` վերաֆինանսավորման տոկոսադրույքը բարձրացրեց, բանկերի դեպքում նաև դոլարային պարտատոմսերի թողարկման համար լրացուցիչ պահանջներ դրեց, ինչի արդյունքում էլ արտարժույթի շուկայում կտրուկ անկում գրանցվեց։
«ԿԲ-ն հետաքրքրված է, որ դրամն արժևորվի, քանի որ արժեզրկման արդյունքում գնաճը կտրուկ բարձրանում է, և այս տարվա 5 ամիսների հաշվարկով մենք ունենք 5.5 տոկոս գնաճ, որը փաստում է, որ ԿԲ-ն ձախողել է իր դրամավարկային քաղաքականությունը։ Նրանք ամեն ինչ անում են, որ դրամի արժեքն իջեցնեն, և իրենց նախանշած 5.5 տոկոսը կարողանան ապահովել»,- պարզաբանեց տնտեսագետը։
Փոխարժեքի կտրուկ տատանումների հետևանքով, սակայն, բիզնեսը մեծ կորուստներ է կրում, իսկ մրցակցության բացակայության պարագայում ապրանքների գները չեն նվազում։
Հայաստանում ստվերային տնտեսությունը 2018-ից հետո կրճատվել է 40% -ով. Փաշինյան
«Արժևորված դրամի պայմաններում արտահանողները, որոնք պայմանագիր են կնքել 520-530 դրամով, մեծ կորուստներ են կրում։ 1 դոլարը, որ բերելու են Հայաստան, 490 դրամով են մանրելու և վճարելու աշխատավարձերը, ոչ թե 530-ով, 40 դրամ կորուստ են ունենալու։ Բնականաբար, այս ամենը բիզնեսի համար ռիսկեր է ստեղծում»,- ընդգծեց Պարսյանը։
Նրա կարծիքով` խաթարված տնտեսությունը փրկելու համար անհրաժեշտ են արմատական փոփոխություններ, նոր տնտեսական մոդել, նոր տնտեսական քաղաքականություն և ամենակարևորը` նոր տնտեսական թիմ։