ԵՐԵՎԱՆ, 28 հունիսի - Sputnik. Մեղրիի զորամասի հրամանատար, գնդապետ Արգամ Գևորգյանի հրամանատարական պարտականությունները կասեցված են մինչև ծառայողական քննության ավարտը։ Տեղեկացնում է ՊՆ մամուլի ծառայությունը՝ արձագանքելով մամուլում տարածվող տեղեկություններին, թե նա շարունակում է կատարել իր պարտականությունները։
«Ի պատասխան լրատվամիջոցներում շրջանառվող տեղեկության, որ ՀՀ ԶՈւ N զորամասի հրամանատար, գնդապետ Ա. Գևորգյանը իր նկատմամբ նշանակված ծառայողական քննության ավարտին ներկայացել է զորամաս և շարունակում է կատարել հրամանատարի պարտականությունները, հայտնում ենք, որ ծառայողական քննությունը երկարացվել է առնվազն մինչև հուլիսի 5-ը, հետևաբար գնդապետ Ա. Գևորգյանի՝ զորամասի հրամանատարի պարտականությունները, համաձայն «Զինվորական ծառայության և զինծառայողի կարգավիճակի մասին» ՀՀ օրենքի, շարունակում են կասեցված մնալ մինչև ծառայողական քննության ավարտը»,- նշված է հաղորդագրության մեջ։
Հիշեցնենք՝ հունիսի 8-ին ՊՆ-ն հայտարարություն տարածեց, որ ՀՀ ԶՈւ N զորամասի հրամանատար, գնդապետ Ա. Թադևոսյանի և N զորամասի հրամանատար, գնդապետ Ա. Գևորգյանի նկատմամբ նշանակվել է ծառայողական քննություն, և այդ ժամանակահատվածում կասեցվել է նրանց ծառայողական պարտականությունների կատարումը։ Մամուլում անմիջապես տեղեկություններ տարածվեց, որ խոսքը Մեհրաբի և Մեղրիի զորամասների հրամանատարների մասին է։
ArmLur.am-ն այսօր գրել էր, որ Գևորգյանը ներկայացել է զորամաս և կատարում է հրամանատարի իր պարտականությունները: «Բանն այն է, որ ծառայողական քննության ժամկետը լրացել էր, և ՊՆ–ն որևէ բան չի գտել հրամանատարի դեմ։ Եվ անկախ ՊՆ ղեկավար կազմի ցանկություններից, հրամանատարը որոշել է «կռիվ տալ» և ներկայացել է զորամաս: Ըստ ArmLur.am-ին հասած տեղեկությունների՝ ՊՆ-ում հրամանատարի քայլից ապշել են, քանի որ կարծել են, թե նա այս ամենից հետո բարոյականություն կունենա և աշխատանքից ազատման դիմում կգրի: Սակայն հրամանատարը որոշել է չհանձնվել: Ինչևէ, ՊՆ ղեկավար կազմն այս հանգամանքից խիստ վրդովված է»,– գրել էր կայքը։
Ըստ տարածված լուրերի՝ Արգամ Գևորգյանի նկատմամբ նշանակված ծառայողական քննությունը նրա քաղաքական հայացքներն են, մասնավորապես կոշտ վերաբերմունքը ներկա իշխանությունների հանդեպ։