Եթե Իրանի նկատմամբ պատժամիջոցները չեղարկվեն, ապա իրանցիներն ակնհայտորեն մեծացնելու են իրենց ազդեցությունը ողջ մերձավորարևելյան տարածաշրջանում, և այդ ազդեցության մեծացման հնարավոր գոտիներից մեկը դիտարկվում է Հարավային Կովկասը։ Sputnik Արմենիայի հետ զրույցում նման տեսակետ հայտնեց Վարդան Ոսկանյանը։
«Խոսքը նախևառաջ քաղաքական ազդեցության մասին է», –ասաց նա։
Իրանագետը հավելելեց` չեղարկումը վերաբերելու է բոլոր պատժամիջոցներին, որոնք կիրառվել են ԱՄՆ–ի կողմից միջուկային ծրագրի համատեքստում և իրանական կողմը գնում է դեպի պատժամիջոցների չեղարկում` չնայած Իրանի նախկին նախագահ Հասան Ռոհանին հայտարարել էր, որ նոր նախագահը կարող է որոշակի վերապահումներ ունենալ տարբեր խնդիրների վերաբերյալ։
«Անկախ պատժամիջոցների չեղարկումից` իրանցիները շարունակելու են նաև այլ ուղղություններով աշխատանքներ իրականացնել։ Խոսքը մասնավորապես վերաբերում է Իրան–Չինաստան համաձայնագրի իրականացմանը, ինչպես նաև ԵԱՏՄ–ի հետ հարաբերությունների խորացմանը»,– ասաց նա։
Հայ-իրանական օրակարգն ամբողջովին պետք է վերանայել. Վարդանյան
Ոսկանյանի կարծիքով` իրանցիներն այժմ շահագրգռված են հատկապես Հարավային Կովկասում իրենց ազդեցության մեծացմամբ` հաշվի առնելով, որ մեր տարածաշրջանում բավականին ամուր դիրքեր է սկսում զբաղեցնել Թուրքիան, ինչը չի բխում իրանական շահերից։ Ըստ նրա`թուրքական գործոնի ակտիվացումը սահմանափակում է Իրանի աշխարհաքաղաքական մանևրի հնարավորությունները դեպի սևծովյան տարածաշրջան և հյուսիս։
«Ստեղծված իրավիճակում առկա են նոր հնարավորություններ հայ–իրանական փոխգործակցության համար։ Ընդ որում` համագործակցությունը կարող է ներառել ոչ միայն ավանդական օրակարգը, որը եղել է մինչև 44-օրյա պատերազմը, այլև բոլորովին նոր օրակարգը, որի կարևոր բաղադրիչը տարածաշրջանի անվտանգությունն է։ Իրանցիները շահագրգռված են մեզ հետ աշխատել այս համատեքստում, ինչը բխում է իրանական շահերից»,– նշեց իրանագետը։
Ոսկանյանի խոսքով` Իրանի ամենաբարձր պաշտոնյաների մակարդակով հնչել են հայտարարություններ, որ իրանցիները պետք է ունենան լայն ներկայություն Հայաստանում և հատկապես Սյունիքի մարզում, ուստի տնտեսական ներկայությունը հիմք կծառայի նաև անվտանգության հետ կապված հարցերում ավելի սերտ փոխգործակցության համար։ Ըստ նրա` հաշվի առնելով նաև ռուսական ազդեցությունն ու ներկայության աճը Հարավային Կովկասում, իրանական կողմի հետ հարաբերությունները պետք է կառուցվեն այնպես, որ տեղի ունենա իրանական և ռուսական շահերի համադրում։
Հիշեցնենք` Հասան Ռոհանին մայիսի 20-ին հայտարարել էր, որ Վիեննայում իրանական միջուկային ծրագրի շուրջ բանակցություններում Արևմուտքի ներկայացուցիչները համաձայնվել են չեղյալ հայտարարել Իրանի դեմ հիմնական պատժամիջոցները նավթի, նավթաքիմիայի արտադրանքի, փոխադրման և ապահովագրման ոլորտում, ինչպես նաև Իրանի Կենտրոնական բանկի նկատմամբ: