Հովհաննես Ավետիսյանի դիտարկմամբ` Նիկոլ Փաշինյանի նախկին կառավարության գլխավոր ձախողումն այն է, որ պետական կառավարման հատվածի բարեփոխումները չեն կայացել, այսինքն նախորդ երեք տարիների ընթացքում կառավարությունը չի կարողացել վերջնական տեսքի բերել այն հայեցակարգը, հանրային կառավարման բարեփոխումների ռազմավարությունը, ինչի շնորհիվ հասարակությունը կտեսներ, թե ինչ համակարգային փոփոխություններ են իրականացվելու։ Դրա մեջ, ըստ փորձագետի, մտնում է, անշուշտ, կադրային քաղաքականությունը։
«Առաջնային խնդիրն այն է, որ պետական կառավարման անարդյունավետ համակարգը, որը ռեսուրսներ վատնող է, դառնա օպտիմալ, կրճատվի, լինի ավելի արդյունավետ, ծառայի իր բուն նպատակին, նպաստի, որ ստեղծվի իսկապես ժողովրդին ծառայող, նրան լիարժեք ծառայություններ մատուցող պետական համակարգ»,– նշեց հանրային կառավարման հարցերի փորձագետը։
Նրա կարծիքով` որպեսզի կարողանան ներգրավել ժամանակակից գիտելիք և կարողություններ ունեցող մասնագետներ, որոնց ռեսուրսը Հայաստանում բավականին սակավ է, նախևառաջ պետք է հստակ գիտակցել, թե կոնկրետ ինչ գործառույթներ պետք է իրականացի համակարգը, ինչ նպատակներ հետապնդի, ուստի այդ առումով Փաշինյանի նախաձեռնած կադրային բանկն էլ ի սկզբանե ձևական բնույթ է կրել ու իր մեջ չի պարունակել որակյալ ռեսուրս։
«Երբ խոսում ենք մասնագետի մասին, ապա նա միայն լավ վարձատրվող տեխնոկրատը չէ, որը տիրապետում է ինչ–ինչ գործիքների, նա նաև գաղափարական մարդ է։ Ներկայիս կառավարությունը ծայրահեղ լիբերալ մոտեցումներ է ցուցաբերում, ինչը որակյալ շատ մասնագետների համար ընդունելի չէ։ Նրանք հրաժարվել են համագործակցությունից դեռ պատերազմից առաջ։ Այս կառավարությունը կանգնել է լուրջ խնդիրների առջև, որովհետև իր գիծը գաղափարական առումով շատ քիչ սատարում ունի»,– ասաց հանրային կառավարման հարցերի փորձագետը։
Ավետիսյանն անդրադարձավ նաև կառավարության այն նախաձեռնությանը, որը ենթադրում էր սփյուռքահայ մասնագետների ներգրավում Հայաստանի կառարաման համակարգում։ Ըստ նրա` նման նախաձեռնությունները չեն կարող հաջողություն ունենալ և օգուտ տալ Հայաստանին, որովհետև սփյուռքահայերը մեծ հաշվով չեն պատկերացնում մեզանում առկա իրականությունը, ինտեգրված չեն մեր կյանքին, ծնվել, մեծացել ու գիտելիք են ստացել բոլորովին այլ միջավայրում, հարմարվել են այնտեղի բարքերին, ուստի չեն կարող հայաստանյան կառավարման ոլորտում որևէ արժեք ավելացնել։
«Պողպատե մանդատ» և հաշտության մեկնած ձեռք. կհաջողվի՞ Փաշինյանին համախմբել ընդդիմադիրներին