ԵՐԵՎԱՆ, 23 հունիսի – Sputnik. Ռուսաստանը զգալի ներդրում է ունեցել ԼՂ–ում հակամարտությունը կանգնեցնելու գործում։ Այս մասին ասվում է Միջազգային անվտանգության մոսկովյան IX համաժողովի մասնակիցներին և հյուրերին ուղղված ՌԴ նախագահ Վլադիմիր Պուտինի տեսաուղերձում։
Պետության ղեկավարի խոսքով` ռուս խաղաղապահներն այսօր տարածաշրջանում հուսալիորեն երաշխավորում են խաղաղությունն ու անվտանգությունը, շատ բան անում հումանիտար խնդիրների բարելավման, տարածքների ականազերծման և Արցախում սոցիալական ենթակառուցվածքները վերականգնելու հարցում։
«Ռուսաստանի վճռորոշ ներդրումով կանգնեցվեց ԼՂ հակամարտությունը։ Ռուսաստանը երբեք չի մոռանում այն պատասխանատվության մասին, որը կրում է հարևան երկրների անվտանգության և բարգավաճման համար, այն երկրների, որոնց հետ մեզ միավորում են պատմական, մշակութային, մարդկային անքակտելի կապերը», – ասել է Պուտինը։
Մոսկվան մտադիր է հետագայում ևս աջակցել տարածաշրջանային հակամարտությունների դեէսկալացիայի, աշխարհամասում խաղաղության ամրապնդման և կայունության գործում։
ՌԴ նախագահը տարածաշրջանային հակամարտությունների կարգավորումը համարում է գլոբալ անվտանգության ապահովման կարևորագույն բաղկացուցիչ։ Եվ Ռուսաստանը ակտիվորեն աջակցում է դրան։
«Դեռ վաղ է»․ Լավրովը՝ Ղարաբաղի հարցի վրա ՀՀ ընտրությունների ազդեցության մասին
«Մեր ռազմական օգնության շնորհիվ հաջողվեց Սիրիայի տարածքի մեծ մասն ազատել միջազգային ահաբեկիչներից, կանխել սիրիական պետության փլուզումը, Թուրքիայի և Իրանի հետ Աստանայի ձևաչափում քաղաքական ու դիվանագիտական աշխատանքը թույլ տվեց ՄԱԿ–ի հովանու ներքո սկսել սիրիական կարգավորման գործընթացը», – հավելել է նա։