ԵՐԵՎԱՆ, 22 հունիսի - Sputnik․ Երկրում սկսվել են քաղաքական բռնաճնշումներ։ Նման հայտարարություն է տարածել «Հայաստան» դաշինքի նախընտրական կենտրոնական շտաբի պաշտոնական ներկայացուցիչ Արամ Վարդևանյանը։
Նրա խոսքով՝ դեռ երեկ վարչապետի պաշտոնակատար Նիկոլ Փաշինյանը խոսում էր համերաշխության ձեռք մեկնելու մասին, բայց այսօր արդեն տարբեր համայնքներից բռնաճնշումների մասին ահազանգեր են ստացվել։ Մասնավորապես, ահազանգեր են եղել այն բոլոր համայնքներից, որոնցում խորհրդարանական արտահերթ ընտրություններում համայնքների ղեկավարները «Հայաստան» դաշինքի համախոհները կամ թիմակիցներն են եղել։
«Այդ բոլոր համայնքներում համայնքապետերին սպառնալիքներով հորդորում են ինքնակամ հրաժարական տալ։ Ժամեր առաջ Լոռվա մարզպետարանում նման պահանջ է դրվել նաև Օձունի համայնքապետ Արսեն Տիտանյանի առջև, և երբ նա հրաժարվել է կատարել մարզպետի պահանջը, հենց մարզպետարանի շենքում ծեծի է ենթարկվել»,- նշված է հայտարարության մեջ։
Ի՞նչ գործ ուներ Արցախի նախագահը ՔՊ-ի շտաբում. Արայիկ Հարությունյանը պարզաբանում է
«Հայաստան» դաշինքը խստորեն դատապարտում է կատարվածը։ Վարդևանյանն ընդգծում է՝ ձեռնարկվելու են բոլոր միջոցներն «այս հաշվեհարդարն իրականացրածներին օրենքի ողջ խստությամբ պատժելու համար»։
Շեշտում է՝ եթե իշխանությունները չդադարեն այս գործելակերպը, ապա քաղաքական նոր ճգնաժամ է սկսվելու։