ԵՐԵՎԱՆ, 22 հունիսի – Sputnik. Գալիք 2 շաբաթվա ընթացքում կորոնավիրուսով վարակվածության 600 նոր դեպք են կանխատեսում, որից 180-ը կհոսպիտալացվեն, իսկ 5-ի վիճակը` ծայրահեղ ծանր կլինի։ Այսօր հրավիրված ասուլիսի ժամանակ նման կարծիք հայտնեց Հիվանդությունների վերահսկման և կանխարգելման ազգային կենտրոնի տնօրենի տեղակալ Գայանե Սահակյանը։
«Կորոնավիրուսային իրավիճակն այս պահին ՀՀ–ում հարաբերականորեն կայուն է, դեպքերի կտրուկ աճ չկա։ Սակայն վիրուսի վերարտադրման ցուցանիշը վերջին 14 օրվա ընթացքում դանդաղ տեմպերով աճում է և արդեն հասել է 1.1-ի։ Սա նշանակում է` դեպքերը չեն կարող աճել այս պահին, սակայն այս վիճակը սպառնացող է։ Այսինքն` հաջորդող շաբաթներին դեպքերի թիվը նախ դանդաղ, ապա կտրուկ կարող է աճել»,–ասաց Սահակյանը։
Նրա խոսքով` սա կարող են կանխել պատվաստումների միջոցով։ Այս պահին ՀՀ–ում 65 719 մարդ է պատվաստվել կորոնավիրուսի դեմ` բնակչության ընդամենը 2 տոկոսը։ Սահակյանը նշեց` տարածաշրջանում վերջին տեղում ենք պատվաստումային ցուցանիշներով։
Մասնագետը նշեց` պատվաստումային ցուցանիշը նվազել է, և եթե այսպես շարունակվի, ապա կորոնավիրուսի չորրորդ ալիքը կգրանցվի Հայաստանում։ Չնայած դրան, ՀՀ–ում ավելանում են օտարերկրացիների թիվը, որոնք ցանկանում են պատվաստվել. այս առումով գուցե առաջիկայում նախարարությունը վերանայի իր պատվաստումնային քաղաքականությունը։
10 հատ ձու, անվճար օղի. պատվաստումը խթանելու ինչ եղանակներ են կիրառվում տարբեր երկրներում
Անդրադառնալով «Սպուտնիկ-V» պատվաստանյութի նոր խմբաքանակ բերելուն` Սահակյանը նշեց, որ ՌԴ–ում արտադրական խնդիր կա։ Նա ասաց, որ եթե նոր խմբաքանակների ներկրման մասին պայմանավորվածություններ լինեն, գուցե նաև պատվաստումների չափորոշիչների մեջ փոփոխություններ լինեն։
Հիշեցնենք, որ Հայաստանում կորոնավիրուսով վարակվածների թիվը վերջին մեկ օրում ավելացել է 77–ով և դարձել 224 330: