ԵՐԵՎԱՆ, 20 հունիսի – Sputnik. Երևանի 9/26 ընտրատեղամասը փակվել է ծափահարությունների ներքո։ Հանձնաժողովի անդամները ծափահարել են հանձնաժողովի նախագահին՝ «Բարգավաճ Հայաստան» կուսակցության ներկայացուցիչ Արմինե Մանուկյանին:
«Հիանալի անցկացրինք ընտրությունները», - ասաց նրանցից մեկը։
Մանուկյանը լրագրողների հետ զրույցում ասաց, որ ամենադժվարը դեռ առջևում է, հանձնաժողովը լուրջ աշխատանք է կատարելու:
«Մասնակցությունն այս տարի շատ բարձր է, ավելի բարձր, քան 2018-ին։ Այն ժամանակ քվեարկել էր քաղաքացիների մոտ 40-45%-ը, իսկ այժմ՝ 57-60%-ը։ Եվ դա կանդրադառնա աշխատանքի ծավալի վրա, իհարկե, ընտրատեղամասում ձայների հաշվարկի համար 2-3 ժամ կպահանջվի», — պարզաբանեց Մանուկյանը։
Նշենք, որ այսօր առավոտյանը ժամը 08։00–ին Հայաստանում տրվեց ԱԺ արտահերթ ընտրությունների մեկնարկը 2008 ընտրատեղամասում։ Տեղամասերից 479–ը տեղակայված են մայրաքաղաք Երևանում, 1 529–ը` մարզերում։
Ընտրողների ցուցակներում այս պահին ընդգրկված է 2 մլն 593 հազար 572 ընտրող: Բոլոր քաղաքական ուժերի ընտրական ցուցակներում միասին վերցրած ընդգրկված է 2510 թեկնածու: Ընտրություններին կհետևեն 8 միջազգային և օտարերկրյա դիտորդական առաքելություն իրականացնող կազմակերպություններ՝ թվով 833 միջազգային դիտորդներ։
Արտահերթ ընտրություններին մասնակցում է 25 քաղաքական ուժ, որից 4-ը դաշինք են, 21-ը` կուսակցություն։
Ուր զանգել ընտրությունների ժամանակ խնդիր տեսնելիս․ ՄԻՊ-ը հեռախոսահամարներ է տրամադրել