ԵՐԵՎԱՆ, 20 հունիսի – Sputnik. Այսօր` հունիսի 20-ին, ժամը 12։40-ին Թալինի ոստիկանության աշխատակիցները ընտրակաշառք ստանալու կասկածանքով բերման են ենթարկել նույն քաղաքի բնակիչներ` կնոջը, ամուսնուն ու դստերը։
Ոստիկանությունը հայտնում է, որ կնոջ մոտ խուզարկությամբ հայտնաբերվել են տարբեր անվանական արժեքներով թղթադրամներ։ Կինը խոստովանել է, որ դրանք իրենց են տրվել իր, ամուսնու և դստեր քվեների դիմաց ԱԺ ընտրություններին մասնակցող դաշինքներից մեկի օգտին քվեարկելու համար։
Ոստիկանությունը նաև հայտնում է, որ Թալինի բաժնի քրեական հետախույզները նախապես տեղեկություններ էին ստացել, որ 43-ամյա մի տղամարդ, նախօրոք ձեռք բերված պայմանավորվածության համաձայն, թալինցի այդ ընտանիքին գումար է խոստացել։ Հանգամանքները քննությամբ պարզվում են։
Նշենք, որ այսօր առավոտյանը ժամը 08։00–ին Հայաստանում տրվեց ԱԺ արտահերթ ընտրությունների մեկնարկը 2008 ընտրատեղամասում։ Տեղամասերից 479–ը տեղակայված են մայրաքաղաք Երևանում, 1 529–ը` մարզերում։
Ընտրողների ցուցակներում այս պահին ընդգրկված է 2 մլն 593 հազար 572 ընտրող: Բոլոր քաղաքական ուժերի ընտրական ցուցակներում միասին վերցրած ընդգրկված է 2510 թեկնածու: Ընտրություններին կհետևեն 8 միջազգային և օտարերկրյա դիտորդական առաքելություն իրականացնող կազմակերպություններ՝ թվով 833 միջազգային դիտորդներ։
Արտահերթ ընտրություններին մասնակցում է 25 քաղաքական ուժ, որից 4-ը դաշինք են, 21-ը` կուսակցություն։
Ուր զանգել ընտրությունների ժամանակ խնդիր տեսնելիս․ ՄԻՊ-ը հեռախոսահամարներ է տրամադրել