ԵՐԵՎԱՆ, 18 հունիսի – Sputnik. Ռուսաստանի արտաքին գործերի նախարար Սերգեյ Լավրովը հրաժարվել է մեկնաբանել Ադրբեջանում թուրքական ռազմակայանների հնարավոր ստեղծման մասին լուրերը ՝ դա անվանելով ասեկոսեներ։ Տեղեկությունը փոխանցում է ՌԻԱ Նովոստի լրատվական գործակալությունը:
«Մենք չենք քննարկել այդ հարցը, և լուրերը մենք չենք մեկնաբանում», - ասել է Ռուսաստանի ԱԳ նախարարը Բելառուսի իր գործընկերոջ` Վլադիմիր Մակեյի հետ բանակցությունների ամփոփիչ ասուլիսում պատասխանելով համապատասխան հարցին:
Ավելի վաղ Թուրքիայի նախագահ Ռեջեփ Թայիփ Էրդողանը, Բաքվում պատասխանելով լրագրողների հարցերին, չի բացառել, որ Շուշիում ստորագրված հռչակագրի շրջանակներում կարող է խոսք լինել Ադրբեջանի տարածքում Թուրքիայի զինված ուժերի ռազմաբազա ստեղծելու վերաբերյալ:
«Դա (բազայի ստեղծման տարբերակը-խմբ.) դուրս չէ հռչակագրի դրույթների շրջանակներից։ Այս հարցի զարգացումը հնարավոր է։ Թեման կարող է զարգացում ստանալ Ադրբեջանի նախագահ Իլհամ Ալիևի և Ռուսաստանի նախագահ Վլադիմիր Պուտինի խորհրդակցությունների ընթացքում: Եվ մեր բանակցությունների ընթացքում նույնպես այն կարող է իրացվել յուրովի», - ասել է նա։
Հիշեցնենք, որ Թուրքիայի նախագահը ադրբեջանցի գործընկեր Իլհամ Ալիևի ուղեկցությամբ հունիսի 15-ին այցելել էր Նախ Վարանդա (Ֆիզուլի), ապա նաեւ Շուշի, որտեղ տեղի է ունեցել երկկողմ համաձայնագրի (Դաշնակցության մասին հռչակագրի) ստորագրումը:
Հայաստանի ԱԳՆ-ն արձագանքել է Էրդողանի և Ալիևի` Շուշի կատարած այցին