ԵՐԵՎԱՆ, 17 հունիսի – Sputnik.Նիկոլ Փաշինյանի գլխավորած «Քաղաքացիական պայմանագիր» կուսակցությունը պարզաբանել է, թե ինչպես է իրենց քարոզչական պաստառը հայտնվել Հայաստանի ազգային պատկերասրահի շենքի պատերին։
«Ի պատասխան հարցումների հայտնում ենք, որ այսօր Հանրապետության հրապարակում տեղի է ունենալու «Քաղաքացիական պայմանագիր» կուսակցության համապետական հանրահավաքը, որի շրջանակում բեմի հետնամասում կախվել են պաստառներ, որոնք հանրահավաքի ձևավորման մի մասն են կազմում: Հանրահավաքից անմիջապես հետո պաստառները կհանվեն»,– ասված է «Քաղաքացիական պայմանագիր» կուսակցության նախընտրական շտաբի հաղորդագրության մեջ:
Նշենք, որ պատկերասրահի շենքի վրա հայտնված պաստառը սուր քննադատության պատճառ է դարձել: Ընտրությունների վերահսկման կոմիտեն հաղորդագրություն է տարածել. «Օրենքը թույլ է տալիս նմանաբնույթ քարոզչական նյութեր օգտագործել՝ բացառապես քարոզչական միջոցառման ժամանակ, այլ ոչ թե դրանից 8-10 ժամ առաջ։ Պահանջում ենք վերացնել խախտումը»։
Պաստառը քննարկման թեմա է դարձել սոցցանցերում։ «Մեկն էլ Գառնի–Գեղարդի վրա կախեք։ Հայկ ջան, սիրուն չի։ Լավ ա` գոնե թուրքական դրոշը չեն կախել»,-գրել են օգտատերերը։
Նշենք, որ ԱԺ արտահերթ ընտրությունները նշանակված են հունիսի 20-ին։ Նախընտրական քարոզարշավը պաշտոնապես մեկնարկել է հունիսի 7-ին։
«Չագուճն առաջինը ձեր գլխին է ջարդվելու». Փաշինյանը կրկին սպառնացել է Զանգեզուրի կոմբինատին