ԵՐԵՎԱՆ, 17 հունիսի – Sputnik. Ռուսաստանի ԱԳՆ պաշտոնական ներկայացուցիչ Մարիա Զախարովան մեկնաբանել է Շուշիում Ադրբեջանի և Թուրքիայի միջև ստորագրված հռչակագիրը։ Այսօր հրավիրված ճեպազրույցի ժամանակ Զախարովան հայտարարել է, որ Ադրբեջանի կամ Հայաստանի հետ երկկողմ հարաբերությունները ԼՂՀ հարցով երրորդ երկրների հետ խառնելը Ռուսաստանը ճիշտ չի համարում։
«Ադրբեջանի և Թուրքիայի միջև բարձր մակարդակով վերջին շփումները մենք դիտարկում ենք սրանից ելնելով», – ասել է ՌԴ ԱԳՆ պաշտոնական ներկայացուցիչը։
Ըստ նրա` Մոսկվայի տեսանկյունից` տարածաշրջանում երկկողմ հարաբերությունները, այդ թվում ռազմական հարաբերությունները, չպետք է կառուցվեն այլ պետությունների դեմ։
«Մենք աջակցում ենք Բաքվի և Երևանի միջև երկխոսության կարգավորմանն ուղղված բոլոր քայլերին, ինչպես նաև Երևան–Անկարա երկխոսությանը։ Հարավային Կովկասում համագործակցությունը պետք է զարգանա բարիդրացիականության սկզբունքներով, և իհարկե, հաշվի առնելով տարածաշրջանի բոլոր երկրների շահերը», – հավելել է Զախարովան։
Էրդողանն ու Ալիևը մտադիր են երկկողմ համաձայնագիր ստորագրել Շուշիում
Հիշեցնենք, որ Շուշիում հռչակագիր է ստորագրվել Ռեջեփ Թայիփ Էրդողանի և Իլհամ Ալիևի միջև։ Փաստաթուղթն Անկարայի և Բաքվի համագործակցության ընդլայնում է ենթադրում ռազմական և ռազմաքաղաքական, ինչպես նաև տնտեսության և էներգետիկայի ոլորտներում։
Հայաստանում հռչակագիրը հասկանալի պատճառներով զգալի հասարակական–քաղաքական արձագանք առաջացրեց։
Հայաստանի ԱԳՆ-ն արձագանքել է Էրդողանի և Ալիևի` Շուշի կատարած այցին