ԵՐԵՎԱՆ, 15 հունիսի – Sputnik. «Քաղաքացիական պայմանագիր» կուսակցությունը որոշել է փոխել համապետական հանրահավաքի օրը։ Այս մասին այսօր Սյունիքի մարզում Սիսիան համայնքի բնակիչների հետ նախընտրական հանդիպմանը հայտարարեց ՀՀ վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը։
«Դուք գիտեք, որ դատական տարբեր որոշումներով և այլն Հանրապետության հրապարակի հետ կապված իրադրություն կա, և մենք քննարկել ու որոշել ենք, որ ՔՊ–ը համապետական հանրահավաքն ու երթը անելու է հունիսի 17-ին, ժամը 20։ 00-ին, Հանրապետության հրապարակում»,– ասաց Փաշինյանը։
Նա շեշտեց, որ փոփոխությունը կատարվել է հատուկ` հնարավոր բախումներից խուսափելու համար։
«Պարտված ուժը, որն արդեն գիտակցում է, որ ջախջախիչ պարտություն է կրելու ընտրություններում, ուզում է ոստիկանության «դուբինկաների» տակ ընկնել, որպեսզի հետագայում ընտրությունների լեգիտիմության վրա ստվեր գցի»,– հայտարարեց նա։
Հիշեցնենք` «Հայաստան» դաշինքը հայտարարել էր, որ իր ամփոփիչ հանրահավաքը տեղի է ունենալու հունիսի 18-ին, ժամը 19։00-ին, Հանրապետության հրապարակում։
Մինչ այդ՝ հունիսի 18-ին հանրահավաք անցկացնելու համար դիմում էր ներկայացրել ՔՊ–ն։ Քաղաքապետարանն էլ որոշել էր, որ «Հայաստան» դաշինքը պետք է հանրահավաքն ավարտի 21․00–ին, ՔՊ–ն իր հանրահավաքը մեկնարկի 20։00-ին։
Արման Թաթոյանին մտահոգել է Փաշինյանի` մուրճի ցուցադրումն ու «կվալդից» խոսելը
«Հայաստան» դաշինքի ներկայացուցիչը դիտորդական առաքելություն իրականացնող կազմակերպությունների ու ՄԻՊ-ի ուշադրությունն էին հրավիրել քաղքապետարանի որոշման վրա՝ ակնկալելով պատշաճ գնահատական։