ԵՐԵՎԱՆ, 15 հունիսի – Sputnik.Sputnik Արմենիային հայտնի դարձավ, որ ֆուտբոլային մեկնաբան Կարեն Ռաֆայելյանին (Vnews) նամակով տեղեկացրել են, որ նա կկարողանա լուսաբանել Եվրո-2020–ը․ հավատարմագրումը հաստատվել է։
Ավելի վաղ հայտնել էինք, որ Ռաֆայելյանին և Դավիթ Եղիազարյանին (News.am) մերժել են Եվրո-2020–ին հավատարմագրվելու հարցում։
Լրագրողները դեռևս 2020 թվականի հունվարին էին հայտ ներկայացրել և համաձայնեցրել ՈւԵՖԱ–ի մամուլի ծառայության հետ այն քաղաքներն ու խաղերը, որոնք կցանկանային այցելել։ Այդ ցանկում, բնականաբար, Բաքուն չի եղել։ Sputnik Արմենիայի թղթակից Խաչիկ Չախոյանին լրագրողներն ասել էին, որ մերժման մասին տեղեկանալով՝ լրագրողները գրել են ՈւԵՖԱ–ին` խնդրելով պարզաբանել, թե կոնկրետ ով և ինչու է մերժել իրենց։ Հայաստանում, բնականաբար, հասկանում են, թե ով և ինչու, սակայն ցանկանում են պաշտոնական փաստաթուղթ ունենալ։
Հիշեցնենք, որ ավելի վաղ Եվրո–2020 խաղերին հավատարմագրում չէին ստացել «Մատչ ՏՎ»–ի լրագրողներ Նոբել Առուստամյանը, Միխայիլ Մոսակովսկին և Կոնստանտին Գենիչը (վերջին երկուսի դեպքում` «ԼՂ այցելության համար» պատճառաբանությամբ)։
Ավելի ուշ ՈւԵՖԱ–ն բացառություն արեց Նոբել Առուստամյանի դեպքում. Ադրբեջանի պլանները ձախողվեցին։