ԵՐԵՎԱՆ, 15 հունիսի - Sputnik. ՀՀ նախկին վարչապետ Կարեն Կարապետյանը դարձել է «мальчик на побегушках»։ Նման հայտարարություն արեց ՀՀ վարչապետի պաշտոնակատար Նիկոլ Փաշինյանը Կապանում քարոզարշավի շրջանակներում «Քաղաքացիական պայմանագիր» կուսակցության հանրահավաքի ժամանակ։
Հայտնել էինք, որ Կարապետյանը նշել էր` աջակցելու է «Հայաստան» դաշինքին։ Ի պատասխան` դաշինքի առաջնորդ, ՀՀ երկրորդ նախագահ, վարչապետի թեկնածու Ռոբերտ Քոչարյանն էլ նշել էր, որ պատրաստ է Կարապետյանին պաշտոն առաջարկել։
«Մեկը կա, ասում է` Կարեն Կարապետյանին կառաջարկեմ վերադառնա, պաշտոն ստանա, աշխատանք է բաժանում։ Մի անեկդոտ կա, է, որ ասում են` դու մի հատ կողմնորոշվի` որսո՞րդ ես, թե՞ չէ։ Կարապետյանը լրիվ դարձել է էդ անեկդոտի հերոսը, այսինքն` դարձել է «мальчик на побегушках»։ Գնդակը դաշտից դուրս ընկավ` վազի՛, վազի՛»,–ասաց Փաշինյանը։
Նրա խոսքով` Քոչարյանը սրան–նրան ՀՀ–ում գործ տալու հնարավորություն այլևս չի ունենալու` այդ Փաշինյանն է նրանց գործ տալու։
«Դուք քյարփինջ եք կրելու Հայաստանում կառուցվելիք մանկապարտեզների և դպրոցների համար»,–ասաց Փաշինյանը։
Հիշեցնենք` Հայաստանում խորհրդարանական արտահերթ ընտրությունները կայանալու են հունիսի 20-ին։
Ընտրություններին կմասնակցեն 21 կուսակցություն և 4 դաշինք, որոնք պայքարում են Հայաստանի ընտրողների ռեգիստրում ընդգրկված 2 581 093 ընտրողների ձայների համար։
«Ջահե՛լ, քո ձեռքերի և ոտքերի դողը շուտով վերադառնալու է». Նիկոլ Փաշինյանը` Վահե Հակոբյանին