ԵՐԵՎԱՆ, 10 հունիսի - Sputnik. Գյումրիում որդեկորույս մայրը 3–րդ զավակին է լույս աշխարհ բերել։ Լուսինե Արսենյանի որդին` Դանիելը, ծնվել է հունիսի 8–ին։
Ավագ որդու՝ Դավիթ Չաքրյանի զոհվելուց հետո 42-ամյա Լուսինեն իր մեջ ուժ գտավ ու 7 ամիս անց ևս մեկ որդի ունեցավ: Դժվար էր, բայց հարազատների ու գործընկերների աջակցությունը նրան օգնեց մայրանալու որոշումը կայացնել:
Դավիթ Չաքրյանը բանակ էր զորակոչվել 2020-ի օգոստոսին: Մոր խոսքով` միշտ երազել էր Արցախում ծառայել: Շատ գոհ ու ուրախ էր, որ Արցախի հողում պետք է ծառայի: Ընդամենը մեկուկես ամսվա զինծառայողը Մարտակերտում մասնակցել է թեժ մարտերին։ Դավիթը զոհվել է հոկտեմբերին: Մայրն իր հղի լինելու մասին իմացել է որդու զոհվելուց մի քանի օր անց: Առողջական խնդիրների պատճառով նա բուժզննում է անցել, պարզվել է, որ հղի է:
«4 տարի պայքարեցինք, որ երեխա ունենանք». Հովհաննեսը զոհվեց` չտեսնելով երազանք-դստերը
Փոքրիկի անունը Դանիել են դրել: Sputnik Արմենիայի հետ զրույցում Լուսինեն ասաց, որ ճիշտ է, Դանիելը լույս աշխարհ է եկել որպես նոր հույս, բայց ոչ իր եղբոր փոխարեն: «Երբ պետք է երկրորդ երեխաս ծնվեր, մտածում էինք, որ տղա լինի, Դանիել կկոչենք, բայց ծնվեց աղջիկս, դրա համար էլ հիմա որոշեցինք այս փոքրիկիս Դանիել կոչել: Ի դեպ, երջանիկ պատահականությամբ կրտսեր որդիս ծնվեց հունիսի 8-ին՝ դստերս ծննդյան օրվանից 16 տարի անց»,-պատմում է Լուսինեն։
Մոր համար այս երեխան սփոփանք է: «Սուտ է, Դավիթս չի մոռացվի՝ ժամանակը չի բուժի վերքը, բայց Դանիելս նոր շունչ ու ապրելու նոր ուժ կտա»:
Փոքրիկը ծնվել է «Գյումրիի մոր ու մանկան ավստրիական հիվանդանոց»-ում: Երեխայի ծնունդին անհամբեր սպասել են նաև Լուսինեի գործընկերները՝ «Գյումրիի մոր ու մանկան ավստրիական հիվանդանոցի» ողջ աշխատակազմը: Լուսինեն հիվանդանոցում կրտսեր բուժաշխատող է:
Սերյոժայի զոհվելուց 25 օր անց տանը մանկան ճիչ է լսվել. ծնվել է Սերյոժա Սերյոժայի Վիրաբյանը
«Շատ սպասված փոքրիկ է, անհամբեր սպասում էինք նրա լույս աշխարհ գալուն: Լուսինեն մեր ստացիոնար հսկողության տակ է գտնվել: Շատ ծանր հոգեբանական վիճակում էր, նաև առողջական խնդիրներ ունի: Բայց կինը հաղթահարեց ամեն ինչ»,- Sputnik Արմենիային ասաց հիվանդանոցի մանկաբարձ-գինեկոլոգ Ալլա Հովհաննիսյանը:
Որդեկորույս մայրերին Լուսինեն խորհուրդ է տալիս իրենց մեջ ուժ գտնել ու նոր երեխաներ ունենալ: «Միայն թե խաղաղություն լինի»,-ավելացնում է կինը:
Որդուն կորցնելու ապրումները չէին կարող չանդրադառնալ կնոջ հղիության ընթացքի վրա։ Փոքրիկը ժամանակից շուտ է ծնվել, լույս աշխարհ է եկել 1 կգ 900 գրամ քաշով, ներարգանդային զարգացման հապաղումներ, նաև շնչառական խնդիրներ է ունեցել:
Հիմա նորածին տղայի վիճակը բավարար է, սակայն մայրն ու որդին դեռ հիվանդանոցում կման ևս մեկ շաբաթ: