ԵՐԵՎԱՆ, 9 հունիսի – Sputnik.Հայաստանի ազգային անվտանգության ծառայության նախկին տնօրեն, «Պատիվ ունեմ» նախընտրական դաշինքի առաջնորդ Արթուր Վանեցյանը հեռուստահաղորդավար Վլադիմիր Սոլովյովին տված հարցազրույցում Ղրիմը ռուսական է անվանել:
Սոլովյովն ուղիղ հարցրել է. «Ղրիմը ո՞ւմն է»: «Ղրիմը մերն է»,– պատասխանել է Վանեցյանը։ Սոլովյովը ճշտել է. «Հայաստանի՞նը»։ Վանեցյանը պատասխանել է. «Ղրիմը Ռուսաստանինն է»։
ԱԱԾ նախկին ղեկավարը հիշեցրել է, որ Ղրիմի բնակչության ավելի քան 95 տոկոսը հանրաքվեի ընթացքում Ռուսաստանին միանալու ցանկություն է հայտնել: Եվ բոլորը պետք է հարգեն ժողովրդի որոշումը։
Վանեցյանը զուգահեռներ է անցկացրել Ղարաբաղի հետ։ Նա հիշեցրել է, որ դեռևս անցյալ դարի 90-ական թվականներին Լեռնային Ղարաբաղի ժողովուրդը ևս ինքնորոշվեց հանրաքվեի միջոցով, բայց, ցավոք, ժողովրդի ինքնորոշման իրավունքը աջակցություն չստացավ։