ԵՐԵՎԱՆ, 8 հունիսի - Sputnik. Սոցիալական ցանցերում այսօր տարածվող տեսանյութում հայ զինվորին ծեծելու դեպքն այսօրվա չէ և նոր չէ։ Տեղեկությունը հայտնում է ՀՀ գլխավոր դատախազի խորհրդական Գոռ Աբրահամյանը Facebook–ի իր էջում։
Նշենք, որ Telegram-ի որոշ ալիքներում տեսանյութ է շրջանառվում, որտեղ երևում է` ինչպես են ադրբեջանցիները ծեծում հայ զինվորներից մեկին։ Ըստ Գոռ Աբրահամյանի` հունիսի 2-ին Վերին Շորժա բնակավայրի սահմանային հատվածում կատարված դեպքն է դա։
«Վերին Շորժա ապօրինի ներթափանցած Ադրբեջանի ԶՈւ ստորաբաժանումների զինծառայողների և տեղում ինժեներական աշխատանքներ կատարող ՀՀ ԶՈՒ զինծառայողների միջև տեղի է ուենցել վիճաբանություն: Դրա ընթացքում Ադրբեջանի զինծառայողների կողմից ծեծի են ենթարկվել և մարմնական վնասվածքներ ստացել հայ երկու զինծառայողներ: Տեսանյութը վերաբերում է նրանցից մեկի հետ կատարվածին»,–գրել է Աբրահամյանը։
«Գերի չընկածը չի կարող ասել` արդյո՞ք կներեն նրան». գերությունից վերադարձածը` Փաշինյանին
Նա նաև հայտնում է, որ նախապատրաստված նյութերի հիման վրա այդ դեպքի առթիվ այսօր ՀՀ զինվորական դատախազության Սևանի կայազորի զինվորական դատախազությունում հարուցվել է քրեական գործ։ Գործը հարուցվել է երկու հոդվածներով` ՀՀ քրեական օրենսգրքի 300.2-րդ հոդվածով (տարածքային ամբողջականությունը խախտելուն ուղղված գործողությունները) և 329-րդ հոդվածի (պետական սահմանն ապօրինի հատելը) 2-րդ մասով:
Հիշեցնենք, որ հունիսի 2-ին ՀՀ պաշտպանության նախարարությունից Sputnik Արմենիային հայտնել էին, որ Գեղարքունիքում կրկին միջադեպ է տեղի ունեցել հայ և ադրբեջանցի զինծառայողների մասնակցությամբ։ Դրա հետևանքով երկու հայ զինծառայող թեթև մարմնական վնասվածք են ստացել։ Ըստ ՊՆ-ի` միջադեպի ընթացքում հրազեն չի կիրառվել. այն արագ հարթվել է հրամանատարության ջանքերով:
«Պաշտոնապես հայտնում եմ` պատրաստ եմ որդուս տալ բոլոր գերիների դիմաց». Նիկոլ Փաշինյան